Kam çizano bi sene coş virana xo ser a ard bî ra pê. Her çiqas ke virana xo bi coş ser a arde pê kî, tayêne re rind, tayêne re kî xirab ame. Merdim ke rindîye û xirabîye eştê têver bawer bike ke xirabîye emser rêna hukim kerd.Tayêne bi kêf û eşq dem û dewran ramit, tayêne kî binê top û tifengan de şîn û şîwar kerd.
Qedir û qiymet nêmendo
Merdim ke zerê yew sîstemê nêweş û xerepîyayî de bî, ya şîn keno, ya kî şîwar keno. Xora no sîstemê dewleta Tirkîya kî sîsteme de xerepîyayê û sîstemê de nêweşo.
Hukumatê AKP problemî çareser nêkerdene de zê her waxtî emser kî xêca zulm û zordarîye ra çîye nêkerd. Kêberê raya haştîye miletî ser o kîp da ca û kilit kerd. Destê ke dergê haştîye kerdî ya amayî şikitene, ya kî kelepçê dayî piro. Qedir û qiymetê însanan nêzanitene de, heqê merdiman nêdayene de, însanan têtuşt de nêguretene de, heq, huquq, adalet binê linganê xo guretene de, însanan re zulm û îşkenca kerdene de, asîmîle û înkar kerdene de… bawer bike ke dewlata Tirkîya ser o yew dewlete de bîne çîna.Yanî na nêheqîyenî ser o ke ewro dewletan mîyan de yew îstastîk ke bîyamênê viraştene Tirkîya rêza yewîne de bêguman cayê xo guret bî.
Her roj qetlîam û zilmî
Zulm û zordarîye, feqîrîye û hêsîrîye bîye zede kemî nêbîye. Mabênê feqîran û dewlemendan de qasê koyan firqe esta. Bi kilmek Tirkîya de feqîrîye, belengazîye, bêkesîye, bindestîye, asîmîlasyon, îmha û înkarkerdene sere xo gureto şona. Kes naye înkar nêkerone. Her roj qetlîamê, her roj zulm o, her roj bombê teqenê û bi desan însanê bêsuc û bêgunayî êne kiştene, her roj domanî êne kiştene yane her roj ma re dinya tarîya. Verba nê zihnîyet o ke wazeno ma werte ra wedaro, verba nê zîhnîyet de gere ma doş biderîme doş û hênî tekoşîn bikerîme. No zihnîyetî hona vizer Parîs de hîre gulê azadîye; Sakîne Cansiz, Fîdan Dogan û Leyla Şaylemeze qetil kerdî. Ewro kî Sîlopî de hîre gulê azadîye; Sêvê Demîr, Pakîze Nayir û Fatma Uyare qetil kerdî.
Omid kena ke, Tirkîya problemanê xo; bi herb nê, bi haştîye, bi zordarîye nê, bi dîyalogî, bi dişmentîye nê, bi dostenî, bi çeteyan nê, bi demokrasî çareser bikero.
Wusênê GESTEMERDE