Nê rojan, rojê Xizirîyê û rojên zaf fîraz û bimbarekê. Yane rojên xêr û xêratanê, rojên nîyaz û mîyazanê, rojên miradanê, rojê cem û cematanê. Bawerîya qizilbaşanê kirmancan de Xizir cayê de taybetî û cayê de zaf muhîm cêno. Xizir de, hîre rojî roce guretene ra dime, mîyaz ênê potene, sere qurbanî ênê birnayene, cem û cematî ênê giredayene. Oncîya no loqmê, mîyaz û qurbanê Xizirî milet ra ênê vilakerdene.
Rojên Xizirî wertê aşma Çele’yî de dest pêkeno û heyanî 15ê Gucige eno fîrazkerdene. La roce Xizirî guretene qizilbaşanê kirmancan mîyan de ca bi ca, mintiqa bi mintiqa kî virîno. Ma vacîme hetê Gimgim de eşîrê bi eşîrê kî roce guretene û roja Xizirî fîraz û bimbarek kerdene virîno. Gimgim de kî hîre rojî roce guretene ra dime, roja poncşemîye mîyaz êne potene, qurbanî ênê sere birnayene, cem êno giredayene û misayibî şonê çêyê misayibanê xo.
Aşma Xizirî de cem
Waxto ke ma hona welat de bîmê, çê ma de hama-hama her sere rojanê Xizir de cem girê dîyenê. Nê cemê Xizirî zêderî hetê Bava Sêy Wusênî (Gimgim-Keça) ra amênê giredayene.Yanî mi zaf cem û cematê Pîr Sêy Wusênî dî. Nê cemê ke ewro îta awropa de organîze kenê û cemê ke welat de ênê giredayenê wertê nê ceman de mi ra gore zaf firqe esta. Yanî taye çî kî giredayîye îtîqatê însananê. Bava Sêy Wusênî ke vatê “Ya Xizir“ çiman ra hesîran mecal ra jumînî nêdene. Mordemî hewes kerde ke venga Xizirî do. Zere mordemî bi rama Xizirî bîyene pir. Bava Sêy Wusên, wayîrê kerametî bî. Wayîrê halê xo bî. Cedê êy cire wayir bî hertim.
Xizir meymanê seata teng o
Xizir hertim roja tenge de hazir û nazir o. Xizir bi ram o. Xizir comerd o. Ma de haşt û yar bone! Xizir, pîye feqîran o, meymanê seata teng o û kesî tenge de nêvirdano. Sala ma û zaf-zêçê ma, aj û amênê ma, cîran û qomê ma, nas û dostê ma, heval û hogirê ma, caran tenge de nêvirdo. Belko ma berzo bo û xatirê xo. Ma de heval bone, pîştî bone. Ma gunekar û xetekarîme, wa belko guna û xeta ma ra vêr o. Xizir caran kesî tenge de nêvirdo, heşarê ma pêroyîne bo, rama xo ra ma mehrum nêvirdo, ma de haşt û yar bo û destê dişmen ra ma û ajê ma nêfîyo...!
Xizirê şima fîraz û bimbarek bo!
WUSÊNÊ GESTEMERDE