Gelo kirmanckî hona binê xeta talokoyî der o? Mordem na perse avêr gere kirmancê ma yê ke bi zonê asîmîlasyonî heşir û neşirê înan ra pers o, gelo êy sene cewap danê na perse. Talokeyê de bîyena zonê bav û kalê ma tewr xem û telaşê nê kasan de nîya. Nê kesê ke zê dirike zeleqîye zonê asîmîlasyonî ra, wa hên ke zonê xo ra zeleqîyene û xizmeta ke zonê asîmîlasyonî re kerda wa nêmede na xizmete zonê xo re ke bikerdene ewro kî belko na perse nîyamenê perskerdene.
Wa êy bi zonê asîmîlasyonî dem û dewran biramê, wa êy bi zonê asîmîlasyonî dim bidê xo, oncîya kî ma bêomid nîmê. Omid est o, çunke goreyê tayine rewşa kirmanckî rind asena, no kî qet bêguman omid dano însanî. Lê gore tayine kî rewşe kirmanckî honde rind nîyasena. Rind aseyena xo a wa ke qet bêguman zonê ma kirmanckî de xêlê xizmete ama kerdene. Mordem nêşîkîno na xizmete înkar kerone. Ewro kirmanckî ser o xebatê hewlî amê kerdene û hona kî nê xebatê hewlî dewam kenê. Oncîya nê serranê pêyenan de hetê xebatkar û kedkaranê zonê kirmanckî ra seba kirmanckî zaf gamê hewlî amayî eştene. Ewro eke bi kirmanckî romanî amê nusnayene, no kî hênî nîşan dano ke kirmanckî gelê rayê gureta. Bi kirmanckî heyanî nika xêle kitabî vêjîyayî. Nînan ra romananî, kitabê hîkayan, kitabê şîîran, kitabê domanan û xêlê kovar, rojname û kêyepelanê înternet de kirmanckî weşanîya. Raştî kî kedkar û fedekarê kirmanckî seba raxelesîyena kirmanckî zere û can ra xebetînê, la no husus de hona kêmasîya qomê ma zaf a. Qomê ma gere etabo virên de zon û kulturê xo re û ayê ra dime kî na xizmete re wayîrîyê bikero ke wa kirmanckî binê xeta talokeyî ra raxelesîyo.
Rind nîyaseyena rewşa kirmanckî kî a wa ke kirmancê ma zonê xo re honde wayîr nêvecîne. Ewro hona kî zaf kirmancê ma çêyê xo de bi zonê xo kirmanckî qesey nêkene. Oncîya lêwe domananê xo de qet tewr qalê zonê xo nêkenê. Herkes kî rind zano ke têmînatê ju zonî domanê. Zono ke hetê domanan ra nîyame qesey kerdene têmînatê ê zonî çîn o. Ewro hona zonê ma hetê domanan ra nêno qesey kerdene. Hona mekteban de zonê perwerdeyî nêbîyo. Werhasil sebebî zafê. Oncîya kî ma şîkîme nê zonî binê xeta talokeyî ra raxelesnîme. Lê ma çiwaxt ke mana û muhimîya zonê dayike rind fam kerde, qedr û qimet da zonê xo, o waxt ma kî zanîme ke zonê ma êndî binê xeta vîndbîyayîş de nîyo.
Kirmancno,
Zonê ma estbîyena ma wo!
Zonê ma nasnameyê ma wo!
Zonê ma estbîyen û çînebîyena ma wo!
Coka mi zonê dakila xo, xo re qible gureto. Hevelno, nayê rind bizanîme ke dakila ma bi nê zonî lorna, bi nê zonî berbê, bi nê zonî huyê, bi nê zonî derd û kederê xo ardî ra zon, bi nê zonî şîn û şîwar kerd, bi nê zonî heyetê xo ramit... Coka gere ma emrê nê zonî derg kerîme. Berenê ma êndî zonê asîmîlasyonî yane zono ke ma qedenay îme, zono ke kirmanckî kerdo binê xeta vîndbîyene êy zonî ra dest û payanê xo bişumê û êndî can û ro biderîme kirmanckî. Berenê ma lawuka/kilama xo zonê xo de vacerîme, berênê ma şîîra xo zonê xo de biwanîme, berenê ma zonê xo de binusnîme, berênê ma zonê xo de biwanîme, berênê ma zonê xo de bihuyîme, berênê ma zonê xo de haşt bîme.
Wusênê GESTEMERDE