Heke yew şar, yew komel xo mîyan de îxanet çin kerd, o wext şeno bi rehetî bicuyo. Sewbîna kes nêşeno rehetî bivîno û do hertim gonî û nale nalî mîyan de bo. Seba çi? Seba ke îxanet zor o.
Ancî îxanet, ancî PDK, ancî keyeyê Barzanîyan û Şingal de. Merdim zor dano xo ke fam bikero. Labelê nêyeno fam kerdene. Îxanet o, ma merdim do senî fam kero ke? Tena merdim şeno îxanetî çin kero. Heke yew şar, yew komel xo mîyan de îxanet çin kerd, o wext şeno bi rehetî bicuyo. Sewbîna kes nêşeno rehetî bivîno û do hertim gonî û nale nalî mîyan de bo. Ne xo ra xeyr vîneno ne zî yewê bînî ra. Seba çi? Seba ke îxanet zor o zaf zor o. 3ê Tebaxe 2014 de ferman ame. Heme çî bi plan bî labelê îxanetî hesabê Apogeran nêkerdibî. Coka êzidî bi temamî çin nêbî.
Nîyet çik o?
Na rey ancî bi îxanetêko gird wazenê êzîdiyê ke Şingal de mendê çin kerê. Serra 2014 de tenya DAIŞ amebî êzidîyan ser. Na fin rewşe ciya ya. Na fin DAIŞ, pêşmergeyên xorotox, qatilê ke TC deresnayê pêro pîya ameyê. Vanê: “Ma do PKK biqewirnê. Gelo ma PKK tena Şingal de ya? Ney. O wext nîyet cîya yo. Gelo nîyet çik o?
* Wazenê mebeynê Rojawan û Şingalî bibirnê. Xora Şingal hîrê serran ra vêşîyo tena Rojawan ra hetkarî gêno.
* Badê ci do verê xo bidê êzidîyan ser û êzidîyê ke Koyê Şingalî ser de ca bîyê çin kerê. Qandê naye zî ganî verê Xanesor dagîr bikerê.
* Peyra zî nînan do verê xo biçarnê Rojawan ser û şorişê şaran ser o hêrişan bikerê. Xora Şingal zî danê ereb û kurdanê sunnî. Hesap no yo. Peynîya nê hesabî de erdê Şingalî ser o yew êzidî zî nêmaneno. Şorişê Rojawanî ser o zî do xeterîye (taloke) bêro awankerdiş.
Êzidî do bêrê pawitene
No plan serkewte nêbeno. Çira? Seba ke gama yewine de Xanesor bi destê Êzidîyên Apoger ame pawitene. Êzidî êzidîyê verê nîyê. Hiş, rêxistin û baweriya înan bi înan esta. Heme şarê kurdî û heme merdimê demokrat piştî danê êzidîyan. Çiyê tewr muhîm zî KCK damusnayîş da û vat: “Ma nêverdanê êzidî bêrê çin kerdiş.” Wata nê vateyan no yo; heme gerîla û welatperwerê kurd seba êzidîyan seferber benê û bedelê ci çi beno wa bibo, êzidî do bêrê pawitene. Seba ke êzidî mîrasê merdimîyê yê ganî her kesê ke vano ez merdim a ganî êzidîyan het de ca bigîro.
‘Şerê mavêna welatperweran û yê xayinan o’
Bêguman êzidîyan mîyan de zî xayînî estê. Naye ver merdim zaf dejeno, la naye yew rastî ya. Çi şar se ra se hol nêbeno. Xeylê pêşmergeyê êzidî zî estê goreyê vatenanê înan do şerê YBŞ mekerê. Ez hêvî kena ke winî bo. Babetêko bîn zî çekûya birakujî ser o yo. Ê yê ke ameyê tîya (Şengal) xora bira nîyê, xayin ê, dişmen ê. Şerê ver bi înan yeno kerdiş ra merdim vajo şerê birakujî zaf şaş o.
No şer şerê welatperweran û yê xayinan o. Labelê nê xayînî wazenê kurdan bi kurdan, êzidîyan bi êzidîyan bidê kiştiş. Naye yew siyaset o ver bi kurdan û êzidîyan yeno kerdene. No het ra zî ê yê xo rê vanê ez welatperwer a ganî aya bê û kiştê îxanetî de mevinderê.Heme şert û şûrtî vanê do îxanet çin bibo, welatperwerî ser kewo. Qandê coy ganî heme şar wa werzo ser pay û îxanetî rê vajo ‘Êdî bes o. Êdî Kurdistan de îxanet ser nêkeweno. Xeta welatperwerî do ser bikewo.
ŞENGAL