Kemal Gun seba ke cenazeya lajê xo Murat Gunî ke bombevarnayîşê dewlete de bi 11 embazanê xo yê DHKCyîyan reyde resa şehadet bigîro, grevê vêşanî dabî destpêkerdiş û grev resabî roja 83. Heta roja 83. hetê weşî de zafî problemî bedenê Gunî de vejîyaybî. Labelê Gunî zaf reyan aşkere kerdbî ke ê do heta peynî çalakîya xo bidomno. Tewr peynî heyetêk şî zîyaretê Gunî. Heyeto ke mîyanê ci de Serekê Baroya Ahmedî Ahmet Ozmen, Serekê Baroya Dêrsimî Bariş Yildirim zî estbî, seba ke Gunî zîyaret bikerî şîyî Dêrsim. Heyet verê ke şêrî hetê Kemal Gunî, Walî û Serdozgerîya Komare ya Dêrsimî reyde pêvînayîşêk viraştî û dima ra vera xo dayî Parka Seyîd Rizayî û ameyî hetê Gunî.
bSerekê Baroya Amedî Ahmet Ozmenî Gunî reyde qisey kerd û ey rê netîceyê pêvînayîşo ke heyetê înan Walî û Serdozgerî reyde kerdbî va. Badê ke Ozmenî Kemal Gunî reyde qisey kerd, îzehetêk da çapemenî. Ozmenî qiseykerdişê xo de dîyar kerd ke înan derheqê teslîmkerdişê cenaze de Walîtî û Serdozgerîya Komare ra soz girewto.
Serekê Baroya Amedî Ozmenî dewamê qisey kerdişê xo de wina va: “Ma sey Baroya Amedî nêşîna vera neheqîyêka winasî de bêveng bimanî û ma seba heqê cuyayîşî ke bingeyê heme heqan o, ma va hem ma Ap Kemalî zîyaret bikerî û hem zî selahîyetdaran reyde pêvînayîş bikerî. Ma Serekê Baroya Dêrsimî reyde verê Serdozgerîya Komare û dima ra zî Walîyê bajarî zîyaret kerd. Netîceyê pêvînayîşî de ma ra ame vatiş ke ‘este û parçeyê bînî yê cenazeyan Meletî ra dîyayî kargo û do mîyanê 1-2 rojan de biresî ma. Eke cenazeyî bêrî, ma do teslîmê Ap Kemalî bikerî’. Ma hêvî kenî ke do sozê xo bitepişî û heta ke merg nêbîyo, cenaze bêro teslîmkerdiş.” Kemal Gunî zî seba netîceyî sipasîya xo seba heyetî kerd û wina va: “Heta ke esteyî teslîmê mi nêrî kerdiş, ez do çalakîya xo bidomna.”
DÎHABER/DÊRSIM