Serokê partiya qetilkara Dersîm, CHP, Kemal Kiliçdaroglu nî rozan de avukatenyê xo yê Ergenekon tam kerde zelal.

Kiliçdaroglu ergenekonîstan tam mudafa keno.
Ergenekonîstî leto jede esker yê.
Nî eskeran dewê kurdan vêsnê, însanê kurdî qetil kerdê. Binê rayveriye Kemal Kiliçdaroglu de CHP nî qetilkaran mudafa kena/pawena.
Ez bi xo CHP ra çiyode bîn zî nêpîn, çike polîtîka CHP her tim niya biye.
Atatûrk ra bijê hata ewro CHP meseleyî bi simitena gonî halkerdê. Nika zî CHP na metod ana kar. Vatîsê Kemal kiliçdaroglu destur nêdanê ke, mordem zovîna bifikiriyo.
Niyadê se vano!
Kemal Kiliçdaroglu nêwazeno çekuya ‘Tirk’ destura bingehin, yanî anayasa ra vejiyo. Tabî yê herkeşî heqa xo yê weçînîtena kamiye esta. Kemal Kiliçdaroglu besekeno xo jê tirk bivîno, naye rê tewa nêvan. Hama belka taye însan zî na kamiye nêwazenê. Kemal Kiliçdaroglu naca de bi zor herkeşî keno tirk.
Tamam, ma zoneme Kemal Kiliçdaroglu kamiya xo înkar keno.
Tamam, ma zoneme Kemal Kiliçdaroglu îtîqatê xo înkar keno.
Tamam, ma zoneme Kemal Kiliçdaroglu zonê dayîk û bavikê xo înkar keno.
Tamam, ma zoneme Kemal Kiliçdaroglu zonê maya xo de perverde nêwazeno.
Tamam, ma zoneme Kemal Kiliçdaroglu raya qetilkaranê dayîk û bavikê xo ra sono.
Hama kerkes mejbur niyo jê Kemal Kiliçdaroglu bifikiriyo û bi qanun herkesî tirk kero.
Kemal Kiliçdaroglu  însananê aqildaran (akil insanlar) ra vano, nînan “aqilê xo do kîra.”
Vajîme ke nînan aqilê xo do kîra, roze ke amê onca peyser cenê.
Pekî mordem însanê jê Kermal Kiliçdaroglu ra se vazo? Kemal Kiliçdaroglu xo înkar keno, o waxt mordem şîkîno vazo: Kemal Kiliçdaroglu aqilê xo roto.
Jû faşîsto bîn zî Kamer Genç o. Waxtoke demê Newroze Amed de mektuba Ocalan amê wendene, Kamer Genç meclîsa tirk de vat “dewleta tirk ewro defin biya.” Jû mebusê tirkî niya nêvat, mebusê tuncelî Kamer Genç vat.
2 tuncelîzî amê meclîsa tirkî de, tirk ra zaferî bîye tirk. Jû tuncelîzê bîn zî, Huseyîn Aygun, nî rozan de vengê xo kerdo vîndî.  Mêrik ça vengê xo vezo ke, o zî aza û mebusê CHP wo. Xorê serasma xo ceno, osenek osenek çê xo de nîseno ro. Verva vatîsanê Kemal Kiliçdaroglu pizze cira nêvejîna. Eke vengê xo vezo, kariyera xo darbe cena.