Goreya daneyêy rayîrberîya Konservatûvara Aram Tîgranî ya bin banê Şaredarîya Gird a Amedî de pewerdeya muzîkî dana domanê kurd. Emserr se domanê kurd semedo ke perwerdehîya muzîkî bigê ra qeyda xo viraştî. Coş û heyecana domanan û malbatan akerdişî de bi her hawayî ver polan de ame vînayiş.
Goreya rayîrberan ard ziwan na game 2 rojan do atolya domanê 6 serre û 14 serreye dest pê kerdo. Ey ra pey do domanê ke goşê înan yê mûzîkî estêy bêrî neqnayiş û dest bi perwedehî bikerêy. Domanan mîyan de do 40 domanî bêrê weçînayiş û perwerde bi ey domanan bidomyo.
Hewt polîy estî
Goreya rayîrberan pey atolyeyî de wendekarê serkewte do qursan de dersê pîyano, def, tembûr, keman, kemançe û elbaneyî bêrî dayiş. Dema ke dersî dest pê bikerî do wendekarî Pola Hesen Zîrek, Pola Fatima Îsa, Pola Şakiro, Pola Sûsika Simo, Pola Avger, Pola Meryem Xan û Pola Mihemed Şêxo de dersê muzîkî bivînêy.
Polê ke humara înan hewt hebîyê de wendekarê kurd do dersê muzîkî bivînî û goşê xo û mezgê xo bi muzîkî pir bikerî û amayişî de domanê muzîkjen û komelî peyda bibê ra xebatan bivînê.
Coşa domanan
Akerdişê weçînayişê atolyeyî de malbatê ke beşdar bî sifte lîsteya polan ser de daliqnayebi ewnîyay. Pey ra domanê xo pola ke nameyê ci tede bi de bica kerdîy. No demî de coş û heyecana ke rîyê domanan û malbatan de bi bi her hawayî eysayê. La tikey domanî zî semedo ke şermok bî tikey rayan bermaynê la rayna zî kewtî atolyeyî.
Wa muzîk aver şêro
Mamosteyê Konservatûvara Aram Tîgranî 6 kes î. Bi nêy mamosteyan konservatûvarî de bi her hawayî dersê muzîkî yeno dayiş. Mamosteyan ard ziwan ke heta ke destê înan ra bêrêy do xebatê muzîkî biderî domanê kurd ke muzîka kurdan û bi no hawa no warî de çanda kurdan avera bişêro yo.