Nînan ra yew zî Fermandara YPJe Arîn Mîrkan a. Semedê ke xelaskerdişê Gilê Miştenûr rolekî dîyarker kay kerd, welatijî nameyê tutanê xo Arîn ranay. Ser sergêrra şehadetê Arîne, Asayîşê Cenîyan a Rojawanî ra Şêrîn Haco û Keyeyê Cenîyan a Rojawanî ra Meqibula Fewizî qalî kerdî.
Ruhê xoverdayişî
Asayîşê Cenîyan a Rojawanî ra Şêrîn Haco ser kesayetîya Arîn Mîrkan ciresna ke Arîn hêz daya cenîyan û wina domna: “Bi çalakîya Arîne cenîyê newe ra amey xo ser û haya hêzê xo bî. Kamder wext ke cenî hêzê xo ra bawer kerdî aye wext fam kerdî ke eşkenî zaf çîyan bikerî. Cenî fam kerdî ke eşkenî çeteyê DAIŞe ke dinyaye de bi hovîtîya xo yenî naskerdiş vero xo zî bidî. Cenî bi no hawa bî wayîrê moralî û hîna weş xebat meşnay. Bandorê kedê Arîne ser rayvistkerdişê cenîyan a şorişê Rojawanî de xeylê gird bî. Cenîyê kurdan bi hêza Arîne heme dinyaye de amey naskerdiş.”
Îlaheya bawerîye bî
Keyeyê Cenîyan a Rojawanî ra Meqibula Fewizî zî bal ant ser cesaretê Arîne û wina verdewam kerd: “Arîn bi çalakîya xo vernîya çalakîyanê DAIŞe girewt. Gilê Miştenurî de destaneke nuşt. Arîn tena hetê fîzîkî de nê, hetê manewî de zî hêz û moral da embazanê xo û lingê dişmenê xo şikna. Arîn Miştenurî de qederê merdimatî bedilna. Semedê ma Arîn îlaheya bawerî û xoverdayîşî ya.”
Welatij Şefî Naso zî ard ziwan ke Arîn bi cesaret û çalakîya xo bîya sembol û qalîkerdişê xo wina peynî kerd: “Bandorê Arîne tena ser cenîyan de nê, ser heme komeleye de hetê cesaret û serkewtişî de bî sembol. Arîn bi çalakîya xo hêzê gird ke mîyanê ma de vet werte. Ma camêrdî zî tewr kêm sey cenîyan çalakîya Arîne ra têkoşîn û xoverdayişê musayî û ma zî sey Arîn verxo bidî.”
GULÎSTAN BEKÎR/JINHA/HESEKÊ