Lokman Ehmêd vat ke xalê muhîm ê pêameyîşê komelî ra yew zî pawitişê xoza û ekolojî yo û wina vat: “Seba awankerdişê komelêko demokratîk û ekolojîk, seba pawitişê xoza ma birê muhîm girewtî. Ma Rojawan de heme rayvistişê komelî yê sivîl û partîyê sîyasî zîyaret kerdî û vernîyazê înan girewtî û bi no rengî ma hewl dayî ke fam bikerî mîyanê pêameyîşê komelî de çi yeno waştiş bibî. Nîqaş û xebatê ma yê vernîyazî ser o vejîyayî dewam kenî. Vernîyazan de taybetî birayîya şaran, zeypêyîya cenî-mêrde, azadîya cenî û pawitişê heqê heme şarê mîyanê pergalê federalî yê demokratîek de ca gênî, yeno waştiş.”
Peymeyê azadîyan
Elîzabet Gewriyeya ke suryanî ya aşkera kerd seba awankerdişê komelêko newe, ê birê muhîm girewtî û wina domna: “Ma xebatê xo, bingeyê azadî ya cenî ser o aver benî. Pergalê ma seba heme şaran vîyarte yo. Mîyanê pergalê federalî yê demokratîke de heme şar, kultir û dîn ca gênî. Raşteyê komelî û cuya hembar babetêka muhîm a.”
Ahmet El Salmano ke ereb o ciresna ke kurd, ereb, suryanî û şarê bîn ê Kantona Cizîrî de cuyenî, ziwanê înan cîya zî bibo, kultirê înan nêzdî yewbînan î û wina domna: “Babeta bingeyîn de armancê ma yew o, seba azadîya heme şaran ê raybazê çareserî yê muhîm destnîşan kerdî. Kurd, ereb, asurî-suryenî, tirkmen, çeçen û heme şarê bîn ê Rojawan de cuyenî, hûmara înan çiqas zî bibo, ma heqê înan ê demokratîke esas gênî.”
Birayîya şaran esas a
Esat Beşîr El Yasîno ke tirkmen o bal ant rolê şarê Mezopotamyayî yê xelqkerdişê şaristanî de û wina peynî kerd: “Ma heme şar, nika bi rengêko azad û zeypê pîya cuyenî, ma eşkenî dorûverê nirxê hembar de cuyayêka bi rayvistî awan bikerî. Mîyanê pergalê ma de heme şar ca gênî. Ê beşêka muhîm a pêameyîşê komelî qedînayî. Armancê ma awankerdişê dewletêka newe nîyo. Ma wazenî dewlet şenik bikerî. Xebatê ma ver qedînayîşî de yo, bi pergalê xo ma wazenî cêrî ver bi corî pergalo demokratîk awan bikerî.”
MEHMET NURÎ EKÎNCÎ / ANF/DÊRÎJ