Bertekey şarî dijî nê tecrîdî her ke şono vêşî beno. Pawitoxê Rayverê Şarê Kurd Abdullah Ocalan Ebru Gunay tecrîd sero qalî kerd û ard ziwan ke tecrîd tena ser yew kesî nîno kerdiş, temamê şarê kurd sero yeno kerdiş û bê bêyntar no 16 serrre yo ke no tecrîd yeno cuyayîş, xora mantiqê zîndana girawî tecrîd sero ameyo awankerdiş û semeda ke qedexeyê lejkerî estîy tecrîd hîna xorînêr beno.
Tecrîdo tîrbîyaye
Ebru dergeyîya qalîkerdişê xo de dîyar kerd ke tecrîd ra-ray tîr beno û ra-ray zî sivik beno û wina vat: “La nika ma tecrîdo tîrbîyaye reyde rîbirî yî. Tecrîd serdemek krîtîk de ameyo girankerdiş. Tecrîdê ke Îmralî de yeno meşnayîş eslê xo de tena ser birêz Ocalanî nîno kerdiş, ê ke yeno tecrîdkerdiş ravêreya çarekerdişî yo. 4 serre yo bi abqatan reyde, 6 aşmî yo keye reyde û 4 aşmî yo ke bi heyetî reyde pêvînayîş nîno kerdiş. Werte de yew neheqîyeke girde esto.”
Ebru aşkera kerd ke tecrîd seyî şûrê demokrasî yeno xebetnayîş û wina dewam kerd: “Key ke karîy goreyê menfîetê tayînan têmîyan kewenîy, aye wext ca de Îmralî de tecrîd yeno xebetnayîş. Duştê ke ma mîyan de yî êdî tecrîd nîno qebûlkerdiş. Ma seyî huqiqnasî do dijî tecrîdî bivenderîy. Tena rayverê Şarê Kurd Abdullah Ocalan ney hetê ey de 5 giroteyê bîn zî binê tecrîdî de yenîy girewtiş.”
Ebru vat ke demo ke şima biwazîy yew fikr tecrîd bikerîy zîndan semeda nê guncav o û mantiqê girawî tena yew kesî ney, êy ke aye kesî reyde heman fikrî barr kenîy, pêro yenîy tecrîd kerdiş.
Do tecrîd bişikno
Ebru ciresna ke dijî tecrîdî ey do duştê dadgehê heremî û mîyannetewî de bi têgêrîy û wina qedîna: “Birêz Ocalan Rayverê şarê kurd o. Na semed ra lazim o agahîyê birêz Ocalanî bêro şarê kurd rê.”