Jû/yew rojê dima, mi nezdiye hîris kesê ke amay bî şewê de qese kerd derheqê şewê de fikrê înan perskerd. Sedra (serra) newaûnew kesî şewê ra memnun bî . Bitaybetî, beşdaran (tewrbîyayoxan) bi vatenê "bi ziwan/zon ê kirmanckî û kurmancki de şewê organîze kerdene şîyê weşa ma...." kêfweşîya xo ardî ser zon. Helbet ma îdarêkerdoxê Komelê bîbîme kefweş. Tayê rexnêyî kî bî û helbet ma ê rexnayîşan cenime çiman ver.
Bi zonê xo ra alaqadar bibime
Şewe de klamî, stranî û şîîr’î bi nê hurdîyan zaravayanê zonê kurdî bî. Komelê ma gereke nê hususan bicerene çiman ver. No karê de fîrazî yo, çimke zonê dayika ma wo. Hemê dezgeh û komelê ma zaf rindek zanene ke, zonê ma sindorê vîndîbîyayîne der o. Şarê ma na yê rindek zaneno, lê çi heyf ke mudaxalê nekeno û bi zerêweşîyê bi zonê asîmîlasyonî qese keno û şewanê kultirê xo organîze keno. Bêşik no ayibê de zaf girso. Rayirberdîş/îdarekerdox ê komelan gereke na raştîyê bîvîne û mudexalê bikere. Endî bi plan û programanê xo yê newîyan bi zonê Dayika xo de alaqadar be û şarî teşviq bikerê.
Xîzmeta asîmîlasyonî mekerenê
Mi gorê keseke hona bi zonê asîmîlasyonî kar û berê xo kene raştîya ma ra, raştîya şarê ma ra zaf zaf durîyê û xizmeta zonê asîmîlasyonî kene. Tîya ra ez venga Hunermandan û sermîyananê komelanê kurdan dana, endî xizmeta zonanê asîmîlasyonî mêkerene. Endî heşarê xo be û xizmeta zon û kultirê xo bikerene. Kesê ke qedr nêdanê zon û kultirê ma, ma kî qedr ci mêdîme, rî ci mêdîme.
Endî zonê asîmîlasyonî cuyê xo ra vejîme
Gelê sermîyanê Dezgeh û Komelanê Gimgimî, Gelê Hunermend û şaîranê Gimgimî, bi kilmek, Gelê Gimgimijan û Gimgimheskerdoxan: Berenê ewro ra tepîya ma şahîyanê xo û şewanê kultirê xo, bi veng û rengê xo bidîme îcra kerdene. Endî zonê asîmîlasyonî cuyê xo ra vejîme. Wexto ke ma hîna (nîya-wina) nêkerd, vatîşê ma bêmane, zonê ma û kultirê ma kî vileyê çewt û hermê varade maneno.
ÎBRAHÎM BEYAZ / BERLÎN