Her şodir verê her kesî wurzena ra. Sey verî. Mekan vurnayo la xuyê xo nêvurnaye. Senî ke verê de ey cenetî de verê tîje wuştênê ra nika kî verê tîje wurzena ra. Bejnade derge ser a ya. Bejnade derg û rindek e. Heybetin a. Heybetê aye tenê bejna aye ra nêno. Hende xo bawer a ke na bawerîye aye kena heybetin. Ya rast serewedar a. Sereberz a. Ti vana qey her vîste de cuye ra vana: Hey cuyê to dî oxrê hende çîyê ke to ardî mi ser kî ez hîna ser linga ya. Ser xo ya. Cuyê ti bi mi nêşkîna. Aye merg derbaz kerdo. Aye xo derbaz kerdo. Aye di lacê xo daye herra welatî. Di lacê xo yê sey aşmaçaresşewe. Lac û kênayade xo gerîlla ye. Ko der ê.
Yo ke aye tewr zîyade dejneno gerîlla ra dûrî kewtîşê ay o. Tawo ke qala şehîdanê xo, delalîyanê xo, delalê xo yê serê koyî, delala xo ya serê koyî kena xo peht gêna. Sereyê xo tayê bîn beno berz. La tawo ke qala gerîlla kena çimê girsê şalenî benê pir. Wazena verê înan bigêro. Meverdo ey sirotanê giloran ra bêrê war la pê nêşkîna. Ê xo vera cêr danê. Ênê resenê gerdanê binê qirtike. Hem berbena hem vana;
"Înan ke ez gerîlla ra visna ez merda. Ez bê gerîlla nêşkîna nefes bigêrî."
Boya gerîlla vana çîyode bîn nêvana. Vana îlahî boya gerîlla. Boyê kena. Ancena zereyê xo. Aye boya înan zereyê xo de zerrîya xo de daya we. Tawo ke vana ez qidayê înan bigêrî hende zerrî ra vana ke ti vana nika zerrî bierzîyo teber îspat bikero ke a çiqas zerrî ra wa.
Cayê xo de nêvindena. Vîstêk cayê xo de nêvîndena. Ti vana qey şeşt serrî nîya hama kênakade azeb a heştes serrî ya. Fek kiras û xeftan ra kî veranêdayo. Kiras xeftan kî hende şîkîyeno ro ci ke qet mevacê. Tawo ke mordem qaytê aye keno xo bi xo nîya vano; pepo kam çi zano naye gencînîya xo de zerrîya çendan vêşnaya. Çendî vêşnaye kerdê wele.
Lewê pêroyê nînan de a bîya şoreşger. A bîya sosyalîst. Şima sosyalîstbîyena aye şîkînê têkîlîya aye û veyva aye de bivînê. Têkîlîya înan ra qet boya têkîlîya vistirî û veyvê nêna. Têkîlîya înan têkîlîya embazîye ya. Ê di embazê rind ê. Pîştî danê yewbînî. Verê dejanê xedaran de pîştî daya yewbînî xo ver ro danê. Verê macîrîya kergane de xo ver ro danê. Ê îspatê hêza cinîyan ê. A hêza cinîyan a ke heskerdene ra êna. Ê hes kene, zêdîyenê. Benê bi hêz. Qewete gênê. Bi na qewete hêz danê der û dora xo. Benê çimeyê cuye.