2 rojî verê hunermend Mîkaîl Aslan û Cemîl Koçgîrî Amed de konserêk da. Konserê hunermendan Keyeyê Mamostayan de virazîya û bi seyan kesî beşdarê konseri bîyî. Konser bi deyîrêka enstrumentale dest pêkerd û dima ra bi deyîra ‘Adirê zerê ma’ dewam kerd. Aslanî dîyar kerd ke ey a deyîre Çemê Muzirî ke barajî ser o ameyî viraştene, nuşto.
Aslanî konser de şîîrêka Şêx Mehdîyî zî va û wina domna: “Na şîîre bi fekê Çewlîgî ameya nuştene. Hetê merdimê ci ra dîyaye mi. Ez zaf şîîre ra tesîr bîya û mi zî ci rê beste viraşt. Edebîyatêko kûr esto na şîîre de. Mîyanê ma de cewherê girdî estî. Amancê mi o yo ke ez nê cewheran veja orte. Şêx Mehdî zî cewherêko winasî bi.”
Konser de Koçgirîyî zî çend deyîrî vatî û Aslanî zî bi klarnetî destek da Koçgîrîyî. Aslanî qala şinasnayîşê xo û Koçgîrîyî zî kerd û wina va: “Cemîl Dêrsim de 3 rojî şono hetê Kalikê Fîrîkî, labelê Kalikê Fîrîk rîyê ey ra nêewnîyeno. Wexto ke do şêro, Kalik rîyê ey ra ewnîyeno û vano ‘ti kam î û key ameyî?’ O zî vano ‘ez wazena tembûr bicina û biba derwêş’. Kalik tembûra ke dês de aliqnaye ya û akordê ci xirabe yo, gêno dano Cemîlî. Ey ra wazeno ke wa bicino. Cemîl wexto ke raşt keno û cineno, Kalik ey ra vano ‘ti heta nika kura de bî?’ Mi zî baş o ke Cemîlî nas kerdo. Ame û akordê tembûra mi viraşt.”
Ver bi peynîya konseri hunermendo herêmî Bawer Karahanî zî bi cumbuşî beşdarê Aslan û Koçgîrîyî bi û deyîrê herêmî cinitî. Kesê ke ameyî konser eleqeyêko gird nîşan dayî.
MA / AMED