Serekê Komê Îslamî yê Kurdistanî (CÎK) Hafiz Ahmet Turhalliyî ameyîşê Aşma Remezanî û zext û zulmê ke benî ser o qisey kerd û hişyarîyê muhîmî kerdî. Turhalliyî va ‘Aşma Remezanî seba ma muslumanan zaf muhîm a’ û wina domna: “Çimkî Qurenê Pîroz na aşme de ameyo û no kitab mabênê raştî û şaşîye de cîyayî ronayo. Pêxemberê ma vato ‘Destpêkê Remezanî rehmet, orteyê ci mexfîret û peynîya ci zî xirabîyan ra dûrî vindetiş o’. Ganî ma zî wina nizdî bibî. Eke wina nêbo, cewherê xo ra vejîyeno.” Turhalliyî dewamê qiseykerdişê xo de va ‘îqtîdar û wayîrê dewlete Remezan cewherê ci ra dûrî kerdî’ û wina dewam kerd: “Seba famkerdişê Remezanî, ganî komê îslamî roje bigîrî. Ewro roje de munaqeşeyê ‘awe remaye fekê mi’, ‘gelo ez eşkena didananê xo firçe bikera?’ û sewbîna yenî kerdiş. Nê munaqeşeyan ra dima çîyê muhîmî sey zure kerdiş, îftîra û sewbîna ameyî vîrîkerdiş.” Turhalliyî peynîya qiseykerdişê xo de wina va: “Ewro qala dîzaynkerdişê dînî kenî. Dîzaynkerdişê dînî yeno manaya goreyê xo kerdişî. Ewro partîya ke îqtîdar de ya, zuran reyde nane feqîran destê înan ra gêna. Goreyê Quren û Îslamî hereket nêkena. Hetêk ra roje tepişenî, hetêk ra dizdê kenî û dest ser malê şarî nanî. Cok ra ganî ma Remezan de heqîqete bivînî û nînan ra dûrî bivinderî. Eke hende neheqîyan ra dima şima hîna zî raya xo danî înan, guneyê ci vileyê şima de yo. Yê ke vano ez musluman a, ganî nê zaliman ra dûrî bivindero.” BRUKSEL/ANF