Cenîyê DBPî vatî ke heme cenîyê têkoşêr ê, eslê cuya yê û dîyar kerdî ke ê do seba nîşandayişê qewetê xo rasteyan ra bivejê, çimkî cenî vateyê cuya ya, edebîyat a, huner a, domyayişê cuya ya, xoza ya û qewetê bedilnayişê cenî esto.
LÊL AMED / AMED
Pêroyina Dinya de cenîyan vera zilmê sîstemê merdeyî vejyayê rasteyan azadîya xo qîrayê û rasteyan de qewetê xo yê rêxistinî nîşan dayê. Cenîyê DBPî zî avzelîya 8ê Adare ser o qise kerdî.
Hemseraka DBPê Amedî Seval Gulmez aşkera kerd ke seba cenîyan 8ê Adare rojêka zaf bi avzel a, 8ê Adare bi têkoşînê cenîyê newyorkijî dest pê kerd, nika asteneka cenîyê bindest û kedkarî ya û wina vat: “Ma demo ke na asteneke ra biewnî ma hewna qirkerdişê cenîye, mêtingerîya keda cenîyê vînenê. Bi Clara Zetkîn 8’ê Adare cuya dî û peynî zî 8ê Adare bî Roja Cenîyan la na roje ra nika çik nêbedilya, çi heyfo ke hema zî keda cenî hem ban hem zî cayê karî de yeno mêtingkerdiş. Zaf bi cenî bê sîgorta xebityenê, xo ra ewleyîya kedkarê banî çin a, eke cenî banî de bixebita qet heqê ci çîn o. Cenî no ser di qet yena mêtingkerdiş.”
Ganî ma 8ê Adare hîna bi vate bikê
Gulmez bal ant vateyê 8’ê Adare ser o û wina domna: “Ganî ma 8ê Adare hîna bi vate bikê, no ser zî taybetî rêxistinîya cenî hîna bêro averberdiş. Çi heyfo ke ma sey cenî hema zî rêxistinîya xo aver nêberdê. Ganî her ca de dîyîşê keda cenî ser o ganî ma têkoşîn bidê, ma şerwanê heqîqetî bibê. Ma heme cenîyan ra veng danî ke bêrê ma pîya cuya hîna vate bikê.”
Hetkara Hemserekîya DBPê Amedî Hava Karahanci zî destnîşan kerd ke 8ê Adare verin sey Roja Kedkarê Cenîye ameynî pîrozkerdiş la nika Dinya de sey roja Cenîyan yena pîrozkerdiş û wina dewam kerd: “Goreyê ma heme cenîyê têkoşêr ê, eslê cuya yê, ma seba paştdayişê yewbînan do rasteyan de bibê. Ma do seba nîşandayişê qewetê xo rasteyan ra bivejê. Cenî cuya ya, edebîyat a, ziwan a, huner a, domyayişê cuya ya, xoza ya. Xo xeliskerdişê zilmê sîstemî ser o, ganî ma rasteyan de têkoşînê xo nîşan bidê.”
Hemsereka DBPê Rezanî Hasret Akay zî pare kerd ke ê bi şîara ‘Hetanî cenî azad nêbo, komel azad nêbeno’ rasteyan ra bivejê, çimkî vatişê sozî înan esto û qewetê înan ê bedilnayişî esto.