Merasîmê cenazeya dayîka Mazlûm Doganî Kebîre Dogane hetê leşkeran ra ameye astengkerdene. Parlamenterê HDPyî Musa Farisogullariyî vera astengkerdişî de reaksîyon nîşan da û dîyar kerd ke no nizdîbîyayîş dişmenîya dewlete nîşanê kurdan dano.
Dayîka rayberanê PKKyî ra Mazlûm Doganî Kebîre Dogane 2 rojî verê wefat kerdbî û wexto ke cenazeya dayîke ameyêne definkerdene, leşkeran astengîyî vetî û bi mehneya ‘rayîr de bomba ameya bicakerdene’ cenaze kewtişê dewa Temanî ya qezaya Mazgêrdî ya Dêrsimî de ameye vindarnayene.
Hemserekê Kongreya Komelê Demokratîke (KCD) Berdan Ozturk, parlamenterê HDPyî û welatîyî pîyarêyan ra şîyî û xo resnayî dewe û beşdarê merasîmê cenaze bîyî. Wextê definkerdişê cenaze de leşkeran dormeyê dewe girewt.
Parlamenterê ke xo resnayî dewe ra Musa Farisogullariyî reaksîyon nîşanê nizdîbîyayîşê leşkeran da. Farisogullariyî va ‘astengkerdiş û bêtehamulîyê ke vera cenazeyan de benî, bîyî polîtîkayê dewlete’ û wina domna: “Ma seba ke cenazeya dayîka xo ya 94 serrî defin bikerî, qezaya Depî ra kewtî rayîr. Labelê hîna 15 kîlometre dewe rê mendbî, leşkeran vernîya ma girewt û destûr nêdayî ma şêrî. Ma nêyî qebul nêkenî. Nê nizdîbîyayîşî dişmenîya dewlete nîşan danî. Dewlete vera cenazeyanê kurdan de daxî polîtîkaya dişmenî domnena. Astengkerdişê cenazeya dayîkêk zî nîşaneyê nêyî yo.”
Şar wayîrê cenazeya dayîke vejîya
Farisogullariyî dewamê qiseykerdişê xo de qala beşdarbîyayîşê merasîme kerd û wina va: “Seba ke dayîka Kebîre dayîka Mazlûm û Delîl Doganî bîye, beşdarbîyayîşê şarî ame astengkerdene. Dayîka Kebîre tena dayîka înan nêbî, dayîka heme kurdan a. Wa dewlete wina bizano. Şarê ma heta nika qet vera zulmî de sere nêrona û wayîrê cenazeya dayîka Kebîre zî vejîya. Girse heme astengîyî derbaz kerdî û beşdarê cenaze bî û no seba ma zaf bierj o.”
Leşkeran waşt ke ma tena bimanî
Kênaya Kebîre Dogane Nezaket Dogane zî reaksîyon nîşanê astengkerdişan da û wina va: “Werdo ke seba xêrê aye ameyêne dayene daxî ame astengkerdene. Leşkeran waşt ezîyet bi şarî bidî antene û waşt ke ma tena bimanî. Labelê şarê ma heme astengîyî derbaz kerdî û ma tena nêverdayî. Ez hemînan rê sipas kena. Dewlete bi nê zordarîyan nêşêna ma teslîm bigîra. Beşdarbîyayîşê cenaze heqo tewr tebîî û merdimî yo. Heme cayanê dinya de cenazeyan rê rêz yeno girewtene. Labelê herçiqas ke ma welatêko musluman de cuyenî zî, tîya de vera cenazeyan de bêrêzî yeno kerdene.”
‘No zulm o, ma qebul nêkenî’
Warezaya Kebîre Dogane Nazîme Polate zî va ‘seba ke ti kes beşdarê cenaze nêbo, cenaze ame astengkerdene’ û wina dewam kerde: “Labelê extîyar, astengdar û nêweşî zî tede bi seyan kesî bi rayîrraşîyayîşî beşdarê cenaze bîyî. Astengkerdişê cenazeya dayîka ke 94 serrî ya, zulm o. Ma kesê ke vera cenazeyanê ma de nînan kenî û kerdişanê înan qebul nêkenî.”
MA / DÊRSIM