Rayvera xoverdayişê Cizîr û Hemseroka Meclîsê Şar yê Cizîr û rayvera xoverdayişê Cizîr Asya Yuksel bodrimê wehşet yê Cizîr de amê qetilkerden û definkerden. Cenazeya Yuksel badê 3 aşman dewa Cizîr Hoser ra hetê malbata ci amê girewten û berdîya warê ke amê dinya, qezaya Şirnex Qileban.
Cenaze bi konvoya wesayîtan bi slogananê “Şehît nêmirenê” resya Qileban. Asya ser milanê alwozanê xo yê cenî berdîya keyeyê ci yê taxa Qulhesnan. Doman û dayîka Yuksel xo eştî ser cenaze wextekê ser cenaze de bermayî.
Asya tekoşîna serbestî kerd berz
Peycoy, ser wesîyetê Yuksel cenaze bi klama “Sê jinên azad” û bi slogananê “”Biciwe Serok Apo”, “Şehîd nêmirenê” hetê hezaran kesan berdîya mezelxaneyê taxa Çeman.
Badê hurmet girewtiş, slogan û tilîliyan Hemserokê HDP yê Qileban Mesût Paksoy’î merasîma definkerden de qisey kerd û da zonayen ke Asya Yuksel rayverîna xoverdayişê xoserî kerdîya. Paksoy’î vist vîrî ke Asya bi xoverdayişê xo tekoşîna serbestî kerd berz û wina va: “Ma zî soz danê alwoz Asya û şehîdanê serwedarnayişî ke ma dê qerardarîya înan biramnê.”
‘Ma bi Asya sere berz ê’
Pîyê Yuksel Abdulkerîm Urun’î zî berxodarîya xo serva şêligî kerd û keynaya xo bi nê vatenan vîr ard: “Asya can a, Asya serhildan a. Asya dayîka Jîyan a, dayîka Şîvan a. Asya keynaya şima pêrokînan a, dayîka şima pêrokînan a. Ma rê herkes Asya ya. Asya bi xoverdayişê xo bî sembola serhildanî. Asya serva serbestîya Kurdistan xover da. Ma bi Asya sere berz ê. Şehît nêmirenê. Badê qiseyan Yuksel leyê birayê xo Necmettîn Urun ke serra 1995î de hetê quwetanê dewlet ame qetilkerden bi kefîyeya ey û bi toximê gulan amê definkerden. Merasîma definkerden bi slogan, çepik û tilîlîyan qedîya.
Zîyaretê serweşî
Badê merasîma definkerden keyeyê Yuksel’î de serweşî ronîya û bi seyan welatijî bi slogananê ‘Cenî cuwyan azadî’, ‘Alwoz Asya nêmerda’ şî keyeyê serweşî.
Şaredara Qileban Zeynep Uren tîya serweşî de qisey kerd û vist vîrî ke Asya rayvera xoverdayişê cenîyanê Botan a. Maya Asya Emîne Yuksel zî pêrokîn zîyaretkaran rê berxudarîya xo ard ser zon û aşkere kerd ke keynaya ayî serva pêrokîn mayan xover da. Zîyaretê serweşî ramenê.
DÎHA/ŞIRNEX