Fermandaranê HPGyî ra Atakan Mahîr û Endamê Koordînasyonê Êzidîyan Zekî Şengalî ke çend rojî verê şehîd kewtbî, Ewropa de yenî vîr ardene. Mahîr û Şengalî bitaybetî Swêd û Almanya de ameyî vîr ardene.
Vîrardişo ke bajarê Uppsala yê Swêdî de ame viraştene de sîyasetmedar Hasan Înceyî qala vîrardişanê xo kerd. Înceyî wina va: “Erjê her yew merdimî têkoşînê Kurdistanî de cîya yo. Ma saya embaz Zekîyî de komelê êzidîyan şinasna.” Qiseykerdoxan dîyar kerd ke seba awankerdişê aştîye ganî Rayberê Şarê Kurdî Abdullah Ocalan azade bibo. Parlamenterê Partîya Çepî Jeanette Escanîlla zî hêrişê dewleta tirkî şermizar kerd û mektûba ke seba Ocalanî nuştbî, teslîmê îdarekaranê NCDKyî kerd.
Hemserekê KONGRA-GELî Remzî Kartalî zî derheqê averşîyayîşê Kurdistan û Tirkîya de qiseykerdişêkî kerd. Kartalî wina va: “Heme embazê ma seba welat û şarê ma fedaî yî û şehadetî rê amade yî. Heta ka şarê ma û yê Rojhelatê Mîyanênî azade benî, ma do têkoşînê xo bidomnî. Şehîdî hetê bindestan de ca gênî û têkoşîn danî. Ma heta nika bi hezaran şehadetê sey Zekî û Atakanî cuyayî. Domanê ma nameyanê înan gênî. Dişmen vano qey bi kiştişî qedêneno, labelê ma newe ra keske benî.”
Bajarê Dresdenî yê Almanya de zî Şengalî û Mahîr ameyî vîr ardene. Vîrardiş de qiseykerdişê Hemserekê Konseyê Caardişî yê KCKyî yê dîmenin ame nawitene. Qiseykerdişan de veng dîya her kesî ke wa têkoşîn bêro gird kerdene. n ANF / BRUKSEL
Parlamentera Partîya Demokratîke ya Şaran (HDP) Salîha Aydenîze derheqê donemo newe de rol û mîsyonê cinîyan de qisey kerde. Aydenîze dîyar kerde ke ê do têkoşînê xo Meclîs û ziqaqan de bidomnî.
Parlamentere Aydenîze daye zanayene ke cinîye hertim hetê îqtîdarê AKPyî ra raştê zextan yena û wina va: “Beden û fikrê cinîyan yenî çinî kerdene. Îqtîdar bi serran o ser heme çîyî de zextî awan kerdî. Dûştê zextan her hetî de bedilîyeno, labelê zextê ke cinîyan ser o yenî kerdene, hertim zêde benî. Bitaybetî wextê OHALî de dezgeyê cinîyan ameyî padayene. Qezencê tevgerê cinîyan çinî ame hesibnayene. Ma zanî ke do bi sîstemê Serekîye, na dişmenîye do qat bi qat zêde bibo.”
Aydenîze dewamê qiseykerdişê xo de wina va: “Faşîzm komelan parçe keno û yewbînan rê dano xerîb kerdene. Helbuk heme problemê cinîyan ortax î. Cok ra ganî heme cinîyî pêro pîya hereket bikerî û têkoşînêko ortax bidî. Ganî ma pîya xeta têkoşînî awan bikerî. Ewro hewl danî têkilîya cinîyan komelî ra biqerfnî. Ma do vera nînan de têkoşîn bikerî.”
JINNEWS / STENBOL