Rayberê Şarê Kurd Abdullah Ocalanî reyde 27ê temmuza 2011î ra nata pêvînayîşê avûkatan nêbeno. Nizdîyê 2 serran o ke Girawa Îmrali ra ti xebere nîna girewtiş. Tewr peynî 27ê temmuze de 4 avûkatî şîbî pêvînayîşê Ocalanî û nê avûkatan ra yewe zî Omer Guneş bî.
Omer Guneş mabênê 2005 û 2011î de 81 reyan Ocalanî reyde pêvînayîşî viraştbî. Guneş derheqê ‘çira avûkatîya Ocalanî keno’ de qisey kerd û qala pêvînayîşan kerd. Guneşî va ‘wexto ke mi unîversîte wendêne, Ocalan ame tepiştiş û mehkemeya ci dest pêkerde’ û wina dewam kerd: “Mi o wext qerar da ke ez do avûkatîya ci bikera. Wexto ke mi dest bi avûkatîye kerd, doza Yewnanistanî ya Ocalanî û dozê bînî dewam kerdênê.”
Guneş pêvînayîşê xo yo sifteyîn 30ê Teşrîna peyêna 2005î de virazeno. Guneş wina va: “O wext nizdîyê 6 aşman pêvînayîş nêvirazîyabî. Herkes meraq kerdêne. O wext reya sifteyîne selahîyetdarê dewlete pêvînayîşî qeyd kerdêne. Mi pêvînayîş ra ver hem kitab û hem zî pawitişnameyê Ocalanî wendbî. Mi xo bi xo vatêne ‘ez do kesêkî entellektuel bivîna’. Mi pêvînayîş de dî ke Ocalan entellektuel, zanayêko gird û keso ke bi hawayo hîra û kûr fikirîyeno yo. Mi 81 pêvînayîşan de ferq kerd ke Ocalan şexsîyeto ke zaf dînamîk o. Seke qet zîndan de wext derbaz nêkerdo, hende dînamîk bî. Wexto ke qisey kerdêne, muqayese kerdêne, analîzanê xo de wayîrê fikrêko dînamîk bî.”
‘Ti kes nêşêno fikrê mi esîr bikero’
Guneşî bale ant rolê Ocalanî ser û wina dewam kerd: “Bitaybetî serranê 2006, 2007 û 2008î de hem hetê psîkolojîk de û hem zî hetê sîyasî de atmosferêko giran estbî û Ocalan nê atmosferî vila kerdêne. Ocalan hem bi moral û hem zî bi dînamîzmê xo hewl dayêne ê atmosferî wedarno. O wext Dayîkê Aştîye vatbî ‘ma do seba azadîya Ocalanî rayîr şêrî’ û Ocalanî zî rojname ra wendbî. Ocalanî vatbî ‘wa seba mi rayîr nêşêrî, ez xora azade ya. Ti kes nêşêno fikranê mi esîr bikero. Beno ke ez bi hawayo fîzîkî tîya de biba, labelê wa ti kes seba azadîya mi nêkewo mîyanê têgêrayîşî’. Kamcîn avûkat bişînê pêvînayîşî dînamîzmê Ocalanî ver şaş mendêne. Ez zî şaş mend bîya.”
Tecrîdêko giran ameynê domnayîş
Guneşî qiseykerdişê xo de qala tecrîdo girankerde kerd û wina va: “Çîyê ke qanûnan de çinêbî, bi hawayo fîîlî ser Ocalanî de ameyêne meşnayîş. Wexto ke problemê kurd giran bîyêne, ser Ocalanî de zî tecrîd giran bîyêne. Bitaybetî mabênê 2005 û 2008î de tecrîdêko giran estbî. 2008 de mudaxaleyê Ocalanî kerdî. Wexto ke pêvînayîşê Oslo dest pêkerdî, zext û tedayî tayê sivik bîyî. Labelê 2011 ra nata pêvînayîş nîno kerdiş û no çîyêko qanûnî nîyo. Labelê esil seba ke Ocalan serekê Tevgerê Azadîye û probleme kurdî de aktor o, raştê tecrîdî yeno. Tecrîd hem fikiranê ci rê hem zî aştîye ser de esto. Tecrîd vernîya mergan akeno û tesîrê ci hîra yî. Eke tecrîd wedarîyo û fikrê Ocalanî biresî hetanê demokratîkan, Tirkîya do aver şêro. Ganî seba wedarnayîşê tecrîdî heme huqûqnasî vindetişêko ortax nîşan bidî.”