Hemverfeka Kongreya Îslamê Demokratîke (DÎK) û Parlamentere Huda Kayaye derheqê tecrîdo ke Rayberê Şarê Kurdî Abdullah Ocalanî ser o esto de qisey kerde. Kayaye va ‘DÎK wazeno ke dîno mezhebperest, dagîrker û nêrî biqedîyo û heqîqete bivejîyo raşte’ û wina dewam kerde: “Awankerdoxê nê perspektî Birêz Ocalan o.”

 

BERÎVAN ALTAN / DÎREN YURTSEVER / MA / ANQARA

Çend rojî verê Kongreya Îslamê Demokratîke (DÎK) Anqara de bi nameyê ‘Îslamcîtîya îqtîdarî û taqwa’ de komxebatêk virazîya. Hemverfeka DÎKî û Parlamentera HDPyî ya Stenbolî Huda Kayaye babete ser o qisey kerd û melumatê muhîmî dayî.

Kayaye va ‘bi serran o ke dîno mezhebperest, dagîrker û nêrî sey vîrusî dormeyê komelî girewto’ û wina domnaye: “Kongreya Îslamê Demokratîke (DÎK) wazeno no dîn biqedîyo û heqîqete bivejîyo raşte. Awankerdoxê perspektîfê DÎKî Birêz Abdullah Ocalan o. Birêz Ocalan şexsîyetê ke lazimîya donemî bi hawayo tewr baş wanenî ra yew o.”

Kayaye dewamê qiseykerdişê xo de wina va: “Dagîrkerî seba ke hêzê xo vînî nêkerî, bi seserran o ke bawerîyan goreyê menfîetanê xo bikar anî. Bingeyê heme bawerîyan de wedarnayîşê sinife, sînor û cîyayîyan û awankerdişê azadîye, aştîye û edaletî esto. Herçiqas ke bi hezaran serrî derbaz bîyî zî nê mesajê rayberan nêbedilîyayî. Birêz Ocalanî zî raştîya tarîxîyan ser ro pêşnîyazêko winasî kerdo. No pêşnîyaz seba dîyayîşê raştîyan yê şarê ma zaf muhîm o.”

 

Tecrîd bi xizmetê heqîqete wedarîyeno

Kayaye qiseykerdişê xo de qala tecrîdo ke Rayberê Şarê Kurdî Abdullah Ocalanî ser o esto kerde û wina va: “Seba ke fek aştî, edalet û azadîye ra veradayî nika Birêz Ocalan binê tecrîdî de yo. Çimkî tecrîd nêbo, şaran hende wehşet nêdîyêne. O wext do polîtîkayê şer, rik û şîddetî do îflas bikerdêne. Cok ra têkilîye ameye birnayene. Sey her wextî rayîrê kesê ke xizmetê aştîye kenî, hetê tayênan ra yeno asteng kerdene. Çareserîya ci zî hîna zaf xizmetê aştî, azadî, edalet û heqîqete kerdene ya.”

 

Ganî hîna rew têrî bimendêne

Kayaye va ‘ma ewro kerdişanê AKPyî yê 16 serrî dima îslamê ewroyîn reyde têrî manenî’ û wina dewam kerde: “Ewro bi mîlyonan merdimî zîhnîyetê Yezîdî vînenî û no muhîm o. Ganî alemê îslamî hîna rew nê têrîmendişî bikerdêne. Labelê dewletî hertim nê têrîmendişî erey kenî.”

 

Vizêr zî qesrî estî ewro zî estî

Kayaye peynîya qiseykerdişê xo de wina va: “Xebata ma ya ewroyêne sey bi derzînî kinitişê bîrî ya. Çîyê ke ma kenî, kerdişê Hz. Huseyînî yo. Yê ke Kerbela de hetgirê qesr û seltanatî bî, hetê Yezîdî de Huseyîn têşan û vêşan verdayî. Ewja de yê ke rayîrê heqîqete de şîyêne, bi rojan têşan û vêşan mendî, labelê fek heqîqete ra veranêdayî. Ganî nêyî bêrî dîyayene. Beno ke ma ewro tay bî û raştê qetlîyam û lînçbîyayîşî bêrî. Labelê ma hemrayê Kerbela yî û wayîrê ê ruhî vejîyenî. Ewro zî hetêk de qesr, seltanat, hêz û menfîet estî, heto bîn de zî yê ke vera qetlîyam, veşnayîş, zîndan û sewbîna de fek heqîqete ra veranêdanî estî. DÎK hewl dano nê raştîyan bipawo.”