Awbendê Ilisû heqaretê tarîx û îxanetê şarê herême yo

ŞÎLAN OZHAN/ŞÛJIN/ÊLIH

Vera viraştişê Barajê Ilisu ke bi taxrîbkerdişê Heskîfo ke tarîxê bi deshezaran serran mîyanê xo de hewêneno de reaksîyonî dewam kenî. Çimkî bi viraştişê nê barajî bi desan qezayê Êlih, Amed, Sêrt, Şirnex û Mêrdînî binê awe de bimanî û bi des hezaran merdimî do koçê sewbîna cayan bikerî. 

Babete ser o Endama Heyetê Îdareyî ya Şûbeya Amedî ya Odeyê Muhendîsanê Cereyanî Armanc Eşîne qisey kerde. Eşîne va ‘emrê barajî do 50 serre daxî nêbo’ û wina dewam kerde: “Hesaban ra seba lazimîya cereyanî ya herême baraj yeno viraştiş, labelê ganî merdim hetê dorme, tarîx, koç, turîzm û sewbîna de bêro ewnîyayîş. Bi viraştişê nê barajî sere de qezaya Heskîfî û tarîxê bi hezar serran binê awe de bimanî û bi hezaran merdimî koç bikerî.”

AKP tebîetî rantî rê akeno 

Eşîne dewamê qiseykerdişê xo de va ‘çinîbîyayîşê Heskîfî seba tarîxê merdimîye, vînîbîyayîşêko gird o’ û wina domnaye: “Herinda nê barajî de sewbîna alternatîfê enerjîyî estî. Tena bi nê berajî problemê enerjîyî yê Tirkîya çareser nêbeno. Heskîf seba se ra 1,4 yan zî 1,5 binê awe de yeno verdayîş, no zî bêxera dişmenî çîyêko bîn nîyo. Herinda HES û barajan de ganî çimeyê enerjîyo ke xo newe keno, bêro tercîhkerdiş. Enerjîyo ke va û tîje ra bêro qezençkerdiş, barajî ra zêde yo. Hukmatê AKPyî roja ke ameyo îqtîdar ra nata tim tebîetî rantî rê akeno. Barajê Ilisu heqaretê tarîx û îxanetê şarê herême yo.”