Serokê Baroyê Dersim Bariş Yildirimî waşt ke qerarê “Îstîmlakê lezî” yê projeyê Awbendê Konaktepe û HES 1, HES 2 ke wazîyeno mîyanê sînoranê Parqa Milî yê Dola Mûnzûrî de bîro viraştiş, bîro betalkerdiş. Yildirimî vist vîrî ke Dersim endî projeyê awbendêko bînî nêşkeno wedarno.
Meclîsê ‘Wa Mûnzûr bê bende pêl bido’ bi wesîleyê Roja Derûdorme yê Dinya de jû kombîyayîşê çapemenî viraşt. Serokê Baroyê Dersim Bariş Yildirim ke kombîyayîş de qisey kerd, vist vîrî ke maneya 5ê Hezîran Roja Derûdorme yê Dinya seba înan wayîrê taybetmendîyêka cîya ya. Yildirimî va, “Ma seba pêrokîn cayanê ke çimeyê dere, çem, ko, ware, merge, kultur û mîrasê xozayî rê mesajê serbestîye danê.
Qerarê “Îstîmlakê lezî”
Serokê Baroyê Dersim Bariş Yildirimî vist vîrî ke Dersim de 5 awbendî yenê viraştiş û da zonayen ke no jew ser cografya de beno sebebê qirkerdişê ekolojîk. Yildirimî da zonayen ke Dersim endî projeyê awbendêko bînî nêşkeno wedarno û waşt ke qerarê “Îstîmlakê lezî” yê projeyê Awbendê Konaktepe û HES 1, HES 2 ke wazîyeno mîyanê sînoranê Parqa Milî yê Dola Mûnzûrî de bîro viraştiş bîro betalkerdiş.
Projeyê madenkarîye zerar danê
Yildirimî herzewbîn hayr ant projeyê madenkarîye yê ke Dersim ser o ferz benê ser zî û ard ziwan ke 145 projeyê madenkarîye zerar danê karakterê ekolojîk yê Dersim û mîrasê xozayî. Nayî ra Yildirimî waşt ke fek nê projeyan ra zî bîro veradayen.
Yildirimî waşt ke ser cografyaya Dersim de pêrokîn projeyê ke benê sebebê texrîbatanê giran bîrê betalkerdiş û wina dewam kerd: “Mûnzûrî ra pîya, ma wazenê ke pêrokîn dereyê ma bê bende pêl bidê. Ma wazenê ke wa mîrasê ma yê kulturî û xozayî bikirêşîyo meştûne. Ma wazenê ke wa projeyê ke yeno waşten ser Laya Pilûr, Laya Perî, Laya Singeç, Laya Hakîs, ser dereyê Hazkar, Dereyê Talat, Laya Karasû virazîyê betal bibê.
DERSIM