Çar leteyanê welatî ra piya, welatanê Awrûpa û xêlê cayanê dinya de Newroz bimbarek bena. Bimbarekînê emserr açarniyay nûmayişê xoverdayişê xoserî. Aktivîteyan de azadiya Rayverê Şarê Kurd Abdullah Ocalan’î ra piya waştena xoseriya Kurdistan berz bena.
Vîyana de YXK adir wekerd
Paytexta Avûstûrya Vîyana de, hetê YXK organîzasyonê bimbarekînê Newroz viraziya. Wendekarê kurd yê ke welatanê ciya ra şî Vîyana, parqa Zangehê Vîyana de adirê Newroz wekerdî. Wendekarê Avûstûryayî zî tewrê bimbarekîn û coşê newroz bî. Înisiyatîfê YXK yê Vîyana, zey her tim, emser zî bimbarekîn organîze kerd, çormeyê adirî de, bi muzîk govend girotî û piya wextê weşî ravêrnay.
Berlîn de resepsîyon
Paytexta Almanya Berlîn de zî şewa verî resepsîyonê Newroz viraziya. Resepsîyono ke hetê NAV-DEM viraziya de Parlamenteranê eyalet yê SPD, Dîe Lînke, Dîe Grune ra piya, xêlê temsîlkarê komel, sazgeh, nuştox û akademîsyenî tewr bî.
Hemserokê NAV-DEM Yuksel Koç qiseyê akerdin kerd kerd. Herzewbîn Azaya KNK Songul Karabûlût, Temsîlkara PYD yê Awrûpa Sînem Mihemmed, Parlamentoyê Eyalet yê Berlin ra Reîmer Mîchael Lehmann, Dîe Lînke ra Chrîstîne Bochholz û Dîe Grune ra Bola Olabwo qisey kerd.
Parlamenter Chrîstîne Bochholz hayr ant teqînayişê Belçîka ser û persa ‘wexto ke DAIŞ’î kurdan qirkerd ercayeyê şima kotî de bî. Wexto ke şima ser goçberan bi Tirkiye îtifaq kerd ercayeyê Awrûpa kotî de bî’ kerd. Bochhoz vist vîrî ke vera DAIŞ xoverdayişê tewr gird şarê kurd dano û vengê paştdayişê kurdan da.
Parlamenterê SPD Reîner Mîchael Lehman zî peymanê goçberan yê Awrûpa bi Tirkiye rexne kerd û hayr ant bêhiqûqîna Erdoogan’î ser. Lehman’î va, rexmê binlingkerdişê heqan îmzakerdişê peyman şaş o. Dîe Grune ra Bola Olabwo zî serva tewrbiyayişê Newroz kêfweşiya xo ard ziwan. Temsîlkara PYD Sînem Mihemmed zî hayr ant muhîmiya Newroz ser û aşkere kerd ke Rojawa de kurdan xeta hîreyîn kerd a û da zonayen ke no proje pêrokîn cenî û şaran rê azadî û têdûştî ano.
Heta ke Rayver Apo azad bibo
Sûka Hollanda Ûtrecht de zî Kurdistanijî coş û heyecanê Newroz de are bî. Kurdan ra piya, alewî û Hollandayijî zî tewrê bimbarekîn bî. Bimbarekîn de serva paştdayenê bi Cizîr û Sur Heyva Sor yardim are kerd. Hunermend Keno Ehmed, Koma Sînor, Ganî Mirzo, Îbrahîm Keîvo sehne girotî.
Sûka girêdayê Federasyonê Rusya Tambov de zî Kurdistanijan bi slogana “Ocalan’î rê azadî, Kurdistan rê statu” Newroz bimbarek kerdî. Hemserokê Konseya Rayverîn yê KCK Cemîl Bayik’î jû mesaj rûşna û Newroz bimbarek kerd.
Azaya Rayverîna KJK Çinar Tolhildan da zonayen ke Newroz tenya jew roşan nê, roja biyayişî ya. Tolhildan aşkere kerd ke hikûmeta AKP û Erdogan waştî Vakûrê Kurdistan de Newroz açarnê gola gonî. La şarê kurd nêame kayanê înan yê qilêrîn.
Panc cayan de adir wedarnay
Çinar Tolhildan da zonayen ke, endî kurdî kaya xo kay kenê û wina va: “Artêşa tirk Vakûrê Kurdistan de binkewt. Kawayê Hemdem bi rihê xoverdayiş tarîx nuşnenê. Tekoşînê şarê kurd heta serbestiya Rayver Apo do biramo. Badê qiseyan hunermend Feyruşah, Hozan Bangîn, Cangir Broyan, Koma folklor a Berîvan, koma folklor a Medya, koma dans a Rus sehne girotî û performansê xo damusnay. Peycoy, şêligî teber de panc cayan de adir wedarnay û govend girotî.
Kurdistanijê ke Kazakîstan de cuwyenê zî Newroz bimbarek kerdî. Sûka Almata de Kurdistanijan ra piya dostanê ci roşanê xo bimbarek kerdî. Bi seyan kesê ke tewrê bimbarekîn bî adir wekerdî, çormeyê ci de govend girotî. Pêrokîn nûmayişan de xoverdayişê qorayirberdişan bimbarek bi. Herzewbîn waştena serbestiya Rayverê Şarê Kurd Ocalan’î mora xo eşt bimbarekînan.
ANF/BRUSEL