Welatanê Awrûpa Almanya, Belçîka, Fransa, Awûstûrya ra pîya bi desan cayan de şewa verî ra nûmayişê protestoyî destpa kerdî.
Sûka Almanya Koln de şewa verî seat 01.00 de Kurdistaniî ver Dêra Dom de are bî û verra girotişê parlementeranê HDP nêrazîbîyenê xo damûsnay. Şêligo ke bi slogananê “Bi xoverdayiş serkewtiş”, “Biciwe HDP”, “HDP rûmetê ma yo” heta ver bana qenala televîzyon yê Alman WDR rayşî. Kurdistanijê ke Dusseldorf û çormeyê Koln de ciwîyenê zî tewrê nûmayiş bî. Îta de Hemserokê KCDK-E Yuksel Koçî qisey kerd û va, ‘Roj roja pawitişî nê, roja wayîrvejyayişê wekîlanê xo ya.’
Kerdenanê derbe lanet bî
Sûka bîn yê Almanya Hannover de zî bado ke xebera girewtişê parlementeranê HDP vila bî Kurdistanijî ver Îstasyonê Tren yê sûk de are bî û hêrsê xo damûsnay. Vizêr zî sûk de ver konsolosxaneyê Tirkîye de nûmayişê protestoyî virazîya. Kurdê ke Mannheîm û çormeyê ci de ciwîyenê zî ver Îstasyonê Tren de are bî û destpa rayşîyayiş kerdî. Vizêr seatanê ver şan de zî Paradeplatz de nûmayişeke protestoyî virazîya.
Frankfûrt de şarê Kurd û dostê ci badê aşnawitişê xebera girotişê wekîlan Meydanê Römerplatz de are bî û heta Îstasyonê Tren rayşî. Sûka bîn nê Almanya Dortmûnd de zî bi seyan kes şewa verî ver Îstasyonê Tren de amey pêhet û derbeya AKP rê nêrazîbîyayiş damûsnay. Sûttgart de zî bi seyan kesê ke Schlossplatz de are bî kerdenanê derbe yê AKP lanet kerdî. Vizêr zî ver Konsolosxaneyê Tirkîye de nûmayişê protestoyî virazîya.
Kurdê ke sûka Almanya Bremen de ciwîyenê zî kewtî radyoyê Bremen û derbeya AKP protesto kerdî. Vizêr zî sûk de nûmayişê protestoyî virazîya. Munîh de zî nûmayişa protestoyî Stachusta de virazîya. Kurdistanijan bi sloganan girotişê wekîlan protesto kerd. Vizêr seatanê ver şan de zî sûk de ver Konsolosxaneyê Tirkîye de nûmayişê protestoyî virazîya.
‘Dîktator Erdogan’
Paytexta Awûstûrya Vîyana de zî girotişê parlementeran rê nêrazîbîyayişeke tûn damûsnîya. Şêligo ke şewa verî ver parlementoyê Awrûpa de are bî slogananê ‘Dîktator Erdogan’ berz kerdî. Vizêr zî seat 17.00 ra tepya ver Konsolosxaneyê Tirkîye de nûmayişa protestoyî virazîya.
Paytexta Fransa Parîs de nûmayişê protestoyî ver parlementoyê Fransa de virazîya. Kurdistanijan sloganê ‘Kiştox Erdogan’ berz kerdî. Kurdê ke sûka Fransa Strasbûrg de ciwîyenê zî ver Îstasyonê Tren de are bî û kerdenanê derbe ra hêrsê xo damûsnay. Vizêr zî ver Konsolosxaneyê Tirkîye de bi tewrbîyayena xêlê kesan Kurdistanijan nûmayişê bêîtatîya sivîl viraştî. Paytexta Îngilîstan London de zî Kurdistanijî ver qenala televîzyonê BBC de are bî. Nûmayiş de bi slogan û qiseyan derbeya AKP rê lanet vornîya.
Dûştê derbeya AKP jû nêrazîbîyen zî paytexta Îtalya Roma ra amê. Kurdistanijê ke ver Konsolosxaneyê Tirkîye de are bî sloganê “Bi xoverdayiş ma dê serkewê” berz kerdî û mesajê çok ronêdayişî day. Sûka Kanada Toronto de zî Kurdistanijî merkezê sûk de are bî û nêrazîbîyenê xo damûsna. Vizêr herzewbîn xêlê welat û sûkanê bîn de zî Kurdistanijî meydanan de bî û hikûmeta AKP îqaz kerdî û waştî ke desinde pêrokîn wekîlî serbest bîrê veradayen.
Vizêr seatanê sodir ra tepya Kurdistanijî Paytexta Belçîka Bruksel de ver Parlementoyê Awrûpa de amey têlewe û mesajê heta peynî xoverdayişî day. Herzewbîn sûka Fransa Strasbûrg de zî ver Konseyê Awrûpa de bi tewrbîyayena seyan kesan nûmayiş virazîya.
NAVENDÊ XEBERAN