Her roja ke şona hêzê cinîyanê kurdan hîna gird beno. Cinîyî bi çalakîyanê xo yê xoverdayîşî, veng danî şarê dinya ke Rayberê Şarê Kurd Abdullah Ocalan azad bibo. Aktîvîsta Tevgerê Cinîyanê Azade (TJA) Ayşe Gokkane serrgêra 18. ya Komloya Mîyanneteweyî de qisey kerde.
Gokkane qiseykerdişê xo de bale ante Komploya Mîyanneteweyî ser û wina va: “Heme kes baş zano ke Abdullah Ocalan bi Komloyêka Mîyanneteweyî teslîmê Tirkîya ame kerdiş. Tewqîfbîyayîşê Ocalanî de şerê 3. yê dinya ame hedefgirewtiş. Felsefeya Birêz Ocalanî heme şaran û bitaybetî zî cinîyan ser de tesîrêko gird viraşte. Heme hêzê mîyanneteweyî û Rojhelato Mîyanênî fikrê Ocalanî ra tersenî. Serra 99, serrêka sîya ya. Hêzê mîyanneteweyî waştê ke fikir û felsefeya Ocalanî çin bikerî, labelê hedefê înan nêame ca û xoverdayîşî her ke şî gird bîyî.”
Ti lîderî zey Ocalanî muhîmî nêdayî azadîya cinî
Aktîvîsta Tevgerê Cinîyanê Azade (TJA) Ayşe Gokkane dewamê qiseykedişê xo de va ‘her ke Ocalan ser de tecrîd gird bî, rêxistinbîyayîşê cinîyan zî gird bî’ û qiseykerdişê xo wina qedênaye: “Derheqê cinîyan de vatiş û nuştişê Ocalanî, heme dinya de eleqeyêko gird ant. Dinya de ti lîderî qasê Ocalanî muhîmî nêdayî azadîya cinî û tevgerê cinîyan. Cok ra cinîyî azadîya Ocalanî sey azadîya heme cinîyan vînenî. Heta ke Ocalan azad nêbo heme kesî tehluke de yî. Qezencê şeran nêmendo. Ganî fek hêrişan ra bêro veradayîş û seba çareserî gamî bêrî eştiş.”
ŞÛJIN/AMED