15 Temuze ra nata her hetan ser de zext û zordarîyî yenî kerdiş û bi no hawa kam ke sey muxalîf yeno dîyayîş, hetê hukmatê AKPyî ra beno hedef û rastê hêrişî yeno. Bi taybetî zî çapemenîya muxalîf rastê hêrişanê tewr girdan ame/yena. 

Bi taybetî mîyanê yew aşma peyên de 12 kanalê televîzyonî, 11 radyo, ajansê DÎHA û JINHA û rojnameyî zî tede xeylê dezgeyê çapemenîye ameyî padayîş. Mamostayê Kurdî Derî zextê ser çapemenîye û bi taybetî padîyayîşê Azadiya Welatî ser o qisey kerdî.

Nêbenî çareserîye

Haci OZKAL: Rojname cuya merdimî de yew cayêko pîl gêno, hakeza televîzyon zî wina ya; merdim pê televîzyonî dinya ra hayîdar beno. Ganî çîyê ke dinya de qewimîyenî merdim bizano ke bişînbo rindî û xirabîya ci ra hayîdar bibo. Zexto ke serra 80î de bî nizdîyê 2 serran dewam kerd û zirarêko pîl da Tirkîyaye. Zext û zordarîyan ver Tirkîya mîyanê dewletanê dormeyê xo ra xeylê tepîya mend.

Zextê ewroyînî zî seba Tirkîya çîyêko baş nêanî. Nê semedî ra ganî Tirkîya ewro ra tepîya biagêra xetêka raşt ser û meyîlê xo bido demokrasîye ser. Eke wina bibo merdim eşkeno havilêk bigîro û xo aydê tîya biveyno. Çepê ci de eke wina nêbo, vernîya merdiman bêro girewtiş, zextî înan ser de bêrî kerdiş, ez bawer kena ti havilê xo çi yê ke zext kenî rê û çi zî yê ke zext vînenî rê esto.

Serranê 90î de rojnameyê Azadiya Welat bi nameyê Welatê Ma vejîyayêne û o wext zî ame padayîş. Dima ra rojnameyê Ozgur Gundem zî ame padayîş. Bade cu tewir tewir rojname, kovare û sewbîna xeylê weşanî ameyî qedexekerdiş û padayîş. Çîyo ke ma tecrubeyanê xo ra zanî, nê gureyî bi padayîş, qedexe û sewbîna hawa çareser nêbîyo û ewro zî nêbeno. Zextê ke ewro bi taybetî rojnameyê Azadiya Welat ser û heme çapemenîye ser o benî, probleman rê ti çareserîye nêanî.

Parçeyêk şerî yo

Xidir KARATAŞ: Ewro Rojhelato Mîyanên de Şerê Cîhanî yê Hîrêyin esto û teşebusê derbe ke 15ê temuze de virazîya parçeyêk nê şerî yê Bakûrî yo. Yeno zanayîş derbe mabênê FETO û AKPyî de parekerdişê îqtîdarî ver virazîya. Nê teşebusê derbe ra dima derbeya bîne zî derbeya AKPyî ya û zextê ke çapemenîye ser zî bi taybetî bi na derbe vejîyayî duştê tewr berz.

Rojnamegerî esasê xo de pêşengîya şarî kenî û wexto ke vengê çapemenîye bibirîyo, o wext yeno manaya ke vengê şarî zî birîyeno. Vera îqtîdarê AKP û yê Qesre de şar mecbûr o ke rêxistina xo awan bikero û zilmî qebûl nêkero. Seba eşnawitişê vengê şarî zî ganî çapemenîye biba. Verê rojnameyê Ozgur Gundemî estbî, padîya û nika rojnameyê Ozgurlukçu Demokrasî esto.

Rojnameyê Azadiya Welat çimê welatî yo, zerrîya welatî ya. Azadiya Welat hem hetê kirmanckî de hem hetê kurmanckî de nizdîyê 20 serrî yo ke xeylê kede dayo. Heta nika xeylê feydeyê Azadiya Welatî seba komelî bîyo. Coka çimê sîstemî bar nêbî û rojnameyî pada. Ma nê helwestî qebûl nêkenî û ganî şarê ma zî qebûl nêkero û Azadiya Welat rê wayîr bivejîyo. Reyna ganî ma vera nê zilmî de şaranê bînan reyde xo bikerî yewe û îtîfaqêk awan bikerî. Ez hem ser nameyê xo û hem zî ser nameyê Kurdî Derî padîyayîşê Azadiya Welatî protesto kena û çi destê ma ra bêro ma amade yî ke bikerî.

Na senî biratî ya

Mezher AKTAŞ: 15ê temuze ra nata rewşêka îstîsnayî Tirkîya de esta û wazenî ke vengê muxalîfan bibirnî. Bi taybetî çapemenîye ser o zextêko gird esto. Mesele televîzyonê Zarok TVyî ke seba domanan tena fîlmanê kartonan dayêne û ti têkilîya xo bi sîyasetî reyde çinêbî, ame padayîş. No zî zext û zordarîyê ke çapemenîye ser de yî nîşan danî.

Mîyanê nê ajans, televizyon û radyoyan ra seba ma yê tewr muhîm rojnameyê Azadiya Welat bî. Çimkî Azadiya Welat tena yew rojnameyo ke bi kirmanckî û kurmanckî weşan kerdêne bî. Mîyanê nê rojnameyî de kultur, huner û heta seba domanan zî yew rîpel estbî. Weşanbîyîşê nê rojnameyî yew hêvî dayêne ma, la nika nînan hêvîyê ma şikna.

Rojnameyê ma verê heftane ameyênê weşênayîş la Azadiya Welat nizdîyê 10 serrî yo ke bîyo rojane. Her çiqas ke çend reyan rastê hêriş û cezayan ameyo zî heta ewro weşanê xo bi fedakarîye domnayo. Ewro Tirkîya vana ma birayê yewbîn î, eke ma birayê yewbîn î o wext qey tena yew rojnameyo ke kurdî weşan keno, esto û o zî yeno padayîş? TRT Kurdî û tayê unîversîteyî ziwanê kurdî reyde eleqeder benî, la ewro tena yew rojnameyêko kurdî weşan keno, esto û o zî yeno padayîş. Ma nêyî qebûl nêkenî û şermizar kenî. Ganî hukmat na şaşîya xo ra biagêro û çapemenîya azade ser ra destê xo bianco. Encax wina bibo ma eşkenî qalê cuyêka ortax bikerî.