Dejê teqayîşê Dîlokî ke 20ê tebaxe de qewimîyabî û netîceyê ci de 56 kesî merdbî, hîna zî teze yî. Îdarekarê hukmatî sebebê kewtişê leşkerê tirk yê erdê Sûrîye û Bab, xo rê sey mehneya teqayîşê Dîlok û Kîlîsî vînenî û wazenê rewşa xo yê dagirkerî meşrû bikerî.
Babet ser o Ayşe Akdogana mexdura teqayîşî ya, qisey kerde.
Ayşe Akdogane (47) qiseykerdişê xo de bale ante kewtişê leşkerê tirk yê erdê Sûrîye û wina va: “12 ferdê keyeyê mi teqayîş de merdî. Tirkîya seba ke heyfê domanê ma bigiro, nêkeweno Sûrîye û Bab. Tirkîya eke wazena seba ma çîk bikera, wa qatilan bivîna û mehkeme bikera. Erdogan seba ke DAIŞî reyde şer bikero nê, seba ke kurdan reyde şer bikero artêşa xo dekerd Sûrîye. Eke wazeno DAIŞî çin bikero, Tirkîya çeteyanê DAIŞî reyde pirr a. Destpêk de wa çeteyanê mîyanê xo pak bikero. Feydeyê şerî ti kesî rê çin o. Ma nêwazenê dest, ling û sereyê domananê ma yê mislimanan hetê çeteyan ra bêrî tirakerdiş.”
Pîyê Orhan Yavuzo ke teqayîş de merd, Kasim Yavuzî zî qiseykerdişê xo de wina va: “Vanî ke ma seba şima şonê Sûrîye la ma zanê ke zûran kenî. Çew nêeşkeno ma bixapêno. Heme şar zano ke teqayîşê Dîlokî de engişta dewlete esta. Cok ra qatilê nêvejenê orte. Ma nêwazenî ti kes bimiro. Ma dej ant wa ti kes nêanco.”
Maya Mahsûm Nasî, Cemîle Nase zî wina va: “Ma bawer nêkenî ke dewlete seba ma şîya erdê Sûrîye. Seba ke vera hêzê kurdan de şer bikerî, şîyî Sûrîye. Heme kes zano ke Erdogan xayîn o.”
BERÎTAN ÎRLAN / DÎHABER / DÎLOK