Partîya Demokratîke ya Şaran (HDP) bi tempoyêka girde dest bi xebatanê weçînayîşî kerde. Namzedê HDPyî xeylê cayan de şarî reyde ameyî têlewe û şarî ra destek waştî. Namzedî hem zereyê welatî de û hem zî Ewropa de bajaranê cîya cîyayan de çarçewaya xebatan de werdê fitarî, zîyaretê esnafan û akerdişê buroyî de xîtabê bi hezaran kesan kerdî.
Namzedê HDPyî mîyanê welatî de bajarê Îdir, Êlih, Amed, Wan, Colemêrg, Mêrsîn, Edene, Osmanîye, Meletî û sewbîna de xebatê weçînayîşî domnayî. Çalakîyan de siloganê ‘Ma ver bi meclîsî’, ‘Hepsîyê sîyasî rûmetê ma yî’, ‘yew ray HDP rê, yew ray Demîrtaş rê’, ‘Ma do bi xoverdayîşî qezenç bikerî’ û sewbîna ameyî eştiş.
Çarçewaya xebatan de namzedê HDPyî qiseykerdişî kerdî û qiseykerdişan de bale ancîya muhîmîya qezençkerdişê weçînayîşî ser û destek ame waştiş. Nînan ra namzedê HDPyî yê bajarê Wanî Tayyîp Temelî qiseykerdişê xo de şarî silam kerd û wina va: “Vernîya ma de weçînayîşêk esto. Ma tena bi hawayo weçînayîşî nêvînenî. No têkoşînê estene yan zî çinêbîyayîşî yo. Şarê ma yê Vakur, Başûr û Rojawanî prosesêko krîtîk ra derbaz benî. Ewro heme çîyê kurdan binê hêrişan de yî. Ma do 24ê Hezîrane de bi vengêko berz ‘Ma tîya de yî, ma eşkenî û ma do qet nêqedî’ vajî. Ganî ma wayîrê sindoqanê xo bivejyî. Wa ciwanî seba wezîfedarîya sindoqan nameyê xo binusnî.”
Heto bîn ra qezaya Geverî ya Colemêrgî de polîsan tehamulê xebatanê HDPyî nêkerd û bi guleyanê plastîkan hêrişê şarî kerdî. Labelê şar reyna zî eleqeyêko gird nîşan da. Polîsan waşt tîya de provokasyon vejî, labelê şar bi siloganê ‘Zextî nêşênî bi ma’ cewab dayî.
Weçînayîşê teberê welatî
Xebatê weçînayîşê teberê welatî de zî bêmabên dewam kenî. Bitaybetî Ewropa de Almanya, Swîsre, Fransa, Hollanda, Avusturya û xeylê cayanê bînan de xebatê weçînayîşî ameyî kerdiş. Bajarê Tîrolî yê Avusturya, bajarê Roermond û Den Haagî yê Hollanda, bajarê Esslîngen, Berlîn, Stuttgart û Goppîngenî yê Almanya, bajarê Zurîh, Bern û Lozanî yê Swîsre û bajarê Marîgnanî yê Fransa de namzedî û şar ameyî têlewe.
Çarçewaya xebatan de qiseykerdişî ameyî kerdiş û qiseykerdişan de ame waştiş ke wa herkes destek bido xebatan û wayîrê partîya xo bivejîyo. Qiseykerdişan de bale ancîya namzedanê elewîyan ser û ame vatiş ke tewr zaf namzedê elewîyî hetê HDPyî ra ameyî nawitiş, ganî elewîyî rayanê xo bidî HDP.
Parlamentera HDPyî ya Stenbolî Huda Kayaye qisey kerde û wina va: “Seba ke peynîya nê zîhnîyetê Yezîdî ke bawerîya şarî îstîsmar keno, ameyo qerarê weçînayîşî girewtî. Seba ke paşayê qesrê emir dayo, heme îmkanî seba ci yenî xebetnayîş. Çîyê ke vizêr Yezîdî Kerbela de bi Îmam Huseyînî kerd, ewro AKP keno. Yezîd û Muavîyeyê roja ma ya ewroyî AKP yo.”
MERKEZÊ XEBERAN