Hemserokê KCD Hatîp Dîcle û Selma Irmak badê munaqeşeyanê hera ê 2 rojî, peynî-nameyê bi sernameyê “Deklarasyonê çareserînê siyasî” ê derheqê xorayverînan de eşkere kerd. Selma Irmak peynînameyê kurdî wend û ard ziwan ke xoserînê demokratîk leteyê demokratîkkerdinê tirkiye yo û serva-qandê nay zî lazimînê bi Destûra Esasîna Demokratîk esto.
Rayverînê xoser heqê do rewa yo
Selma Irmak vist vîrî ke rayverînê tirk badê redkerdinê mûtabeqatê Dolmabahçe û weçînayinê 7ê Hezîran’î darbe viraşt û verra kurdan dest bi lejê-herbê zaf-hetin kerd. İrmak va: Vera siyasetê lej ê AKP, îlankerdinê rayverînê xoser, çiyê en heq û meşrû yo. Irmak peycoy zî, qerarê ke girotî aşkere kerdî:
* Gerek pêroyîn welatî de, çend sûkê ke hetê kiltur, aborî û cografya nezdiyê pêjewînê, herêmê xoser roniyê.
* Herêmê xoserî, hetê kesê goreyê prensîbanê demokratîk weçîniyayê, îdare bibê.
* Herêmanê xoser de, gerek meclîsê sûkan, yê qezayan, mehleyan, dewan, cenî, genc, şar û baweriyê ciya, tewrê wextê qerar-girotin bibê.
* Cenî gerek pêrokîn mekanîzmayanê qerar-girotinî de zeypê temsîl bibê û her warê weşîni de xoserînê ceniyan bisilasiyo.
* Gencî mekanîzmayê qerar-giroten de ca bigîrê.
* Gerek perwerde dewrê rayverînê xoser bibo. Tirkî ra piya, ziwanê bînî zî bibê ziwanê perwerde. Eynî wext de, ziwanê bînî zî bibê ziwanê fermî-resmî.
* Saziyê bawerî bibê xoser, wasten û lazimînê înan birê ca.
* Heme xizmetê weşîni dewrê rayverînê xoser bibê.
* Sîstemê mehkemekerdin û adeletî, goreyê modelê rayverînê xoser newe ra viraziyo.
* Rayverînê xoser, çimeyniyê enerjî û aw ra heqê xo bigîrê, warê citêrîn, senayî, bazirganî de bibê wayirê vateni.
* Sûkanê herêmanê xoser de, xizmetê resnayin, qontrol û trafîkê bejîn, hewayin û deryayin, binê kontrolê rayverînê xoser de bo.
* Serva asayişê herêmanê xoser zî, saziyê asayişê herêmî roniyê. Enê quwetî bi kordîneyê quwetanê ewlekariyê merkeziya karê xo bikirê.
DÎHA/AMED