DENÎZ TEKÎN MA/AMED Wedarîyayîşê destpironêginayîya parlamenteran ra dima 4ê Teşrîna peyêna 2016î de xeylê parlamenterê HDPyî ameybî tewqîfkerdiş û nînan ra yewe zî Parlamenterê Amedî û Endamê Heyetê Îmrali Îdrîs Baluken bi. Bi îdîayanê ‘endamê rêxistine bîyayene’, ‘propogandaya rêxistine kerdene’ û ‘vera qanûnê kombîyayîşî de muxalefet kerdene’ ra pêro pîya 16 serrî 8 aşmî ceza dîyaybî Balukenî. Na cezaye ra 9 serrî 2 aşmî hetê Mehkemeya Edlîye ya Herême ya Dîlok ra ameye tesdîqkerdiş. Tesdîqbîyayîşê cezaya Balukenî raştê dîyarbîyayîşê namzedîya ci ame û no zî bala merdimî anceno. Babete ser o avûkata Balukenî Reyhan Yalçindag Baydemîre qisey kerde. Baydemîre va ‘20ê Gulana 2016î de destpironêginayîya parlamenteran ame wedarnayîş û o tarîx ra nata xeylê neheqîyî ameyî kerdiş’ û wina domnaye: “Balukenî seba ke çîyê ke Meclîs de vatbî, teber de dibare kerdî, ceza girewt. Gelo senî 18 klasorê dosya 2 aşmî de ameyî wendiş? Merdim nêşêno hetê huqûqî de nê qerarî qebul bikero. Badê ke nameyê Balukenî mîyanê namzedan de derbaz bi, cade cezaya ci ameye tesdîqkerdiş û no zî merdimî dano fikirîyayîş. Baluken ewro bi destê huqûqî teberê sîyasetî ame verdayîş. Ma do muracatê Yargitayî û AÎHMî bikerî.”

‘Ma do Kurdistan de qezenç bikerî’

Hemsereka Kongreya Komelê Demokratîke (KCD) Leyla Guvena ke 22ê Çileyî de ameybî tepiştiş û 9 rojî ra dima tewqîf bîybî, Zîndanê Amedî ra mektûbêk erşawite û mektûbe de qala namzedîya xo kerde. Guvene mektûba xo de vato ‘ez Zîndanê Amedî ra selam, rêz û heskerdişê xo erşawena’ û mektûbe wina dewam kerdo: “Ma her şert û merc de moral û hêzo ke şarê xo ra gênî, xover danî. Bi serran o ke vera şarê ma de operasyonê qirkerdişî yenî viraştiş û nêyî nîşan danî ke rayîrê sîyasetî yenî girewtiş. Seba rijnayîşê îqtîdarê AKPyî 24ê Hezîrane firsendêk o. Ganî ma cinî, ciwan, elewî, laz, tirk, kurd û sewbîna bi ruhê 7ê Hezîrane ameyeyêk awan bikerî.” Guvene mektûba xo de qala namzedîya xo kerda û wina vato: “Ez hetê partîya xo ra Colemêrg de namzed ameya nawitiş. Ez do hewl bida biba layîqê vindetişê rûmetinî yê şarê Colemêrgî. Ez veng dana heme cinîye û ciwanan ke wa têkoşîn û pîvananê ma ra tavîz nêdî û xebatanê xo bidomnî. Ez bawer kena ke ma do bi rayberîya cinî û ciwanan de Kurdistan de serbikewî. Ez şima rê heskerdişê xo erşawena û şima hemînan verike kena.” ANF/AMED