Rijnayîşo ke taxanê Alîpaşa û Lalebeyî yê qezaya Sûrî ya Amedî de bin nameyê ‘vurîyayîşo bajarî’ de beno, dewam keno. Welatîyê ke keyeyanê xo nêteriknenî raştê zext û tedayanê dewlete yenî.
Tewr peynî awe û cereyanê taxijan ameyî birnayîş û taxijî vera nêwedarîyayîşê molozî de bireaksîyon î. 2 rojî verê saetanê nîmeroje de awe û cereyanî reyna ameyî birnayîş û rijnayîşî ver moloz hetê ekîbê rijnayîşî ra kewtişê taxe de ame rokerdiş. Wextê rijnayîşî de ti tedbîrî nêameyî girewtiş û taxe binê tozî de manena. Babete ser o taxijan qisey kerd û seba wayîrvejîyayîşî veng dayî.
Bê qanûn û bê nîzam
Suat Sîreko ke taxa Lalebeyî de ronîşeno, va ‘her çiqas ke derheqê bînaya ma de prosesê mehkeme dewam keno, reyna zî her roje ma rijnayîşî reyde têrî manenî’ û wina dewam kerd: “Bê qanûn û nîzam ameyî berê ma ver. Seba rijnayîşî her roje ma ser de zext û tedayan kenî. Wexto ke banî yenî rijnayîş, ti tedbîrî nînî girewtiş. Vizêr ma ra vatî heta teşrîna verêne wextê şima esto, ewro ameyî wazenî birijnî. Ma xo bi zorî eşt teber. Merdimî merda, wa vengê ma bieşnawî, nê do banan ma ser de birijnî.”
Ma nêwazenî bivejyî
Cinîya bi nameyê Sultane zî va ‘ez Sûr de pîl bîya û reya sifteyîn a ke ez bi hawayo ters ziqaqê xo de meşîyena’ û wina domnaye: “Êdî ez tersena gelo kamcîn het ra kerrayêk do sereyê mi bigina. Merdimî merda tîya de. Ti kes vengê ma nêeşnaweno. Ma nêwazenî bananê xo ra bivejyî. Labelê banan ma ser de rijnenî.”
AMED