Rêxistina Bajarê Amedî yê HDPyî xebatê xo yê weçînayîşê herêmî daybî destpêkerdene û na çarçewa de dest bi girewtişê muracatanê endaman kerdbî. Badê ke muracatî destpêkerdî, polîsan banê HDPyî yê Amedî girewto binê abluqayî.
Xeylê polîsan bi wesayîtanê zirxinan dormeyê banê HDPyî girewto û bi kamera û hâlete goşdaritişan dekewtiş û vejîyayîşê banî kontrol kenî. Polîsan kamerayê xo heta berê banî ardî, labelê badê ke îdarekaran reaksîyon nîşan da, polîsî nizdîyê 20 metreyî durî şîyî. Bajar de vernîya bananê CHP, ÎYÎ Partî, Saadet û HUDA Parî de çîyêko winasî çin o û no zî nîşan dano ke no tena vera HDPyî de yeno kerdene.
Hemsereka HDPyî ya Bajarê Amedî Fîlîz Buluttekîne zî va ‘badê ke ma 20ê teşrîna peyêne de dest bi girewtişê muracatanê namzedan kerd, polîsan dormeyê banî girewto’ û wina va: “Herçiqas ke ma hetkarê walîyî reyde pêvînayîş kerd zî, abluqa dewam keno. No abluqa seba weçînayîşê herêmî dewam keno. Kesê ke benî namzed yenî taqîb kerdene. Eke wina bibo, ma do nika ra pey kombîyayîşanê xo teber de bikerî û nika ra pey ma do her roje saetêk çalakîya bêîtîatîya sîvîle bikerî.”
MA / AMED