Bi serran o ke vera hepsîyê ke zîndananê Kurdistan û Tirkîya de manenî de konseptêko taybet yeno meşnayîş. Bitaybetî îlanbîyayîşê OHALî ra dima zext û tedayî hîna zêdîyayî. Nê zîndanan ra yewe zî Zîndanê Tarsusî yo.
Ame musayîş ke hepsîyê ke mîyanê înan de Muxabîrê Ajansê Dîhaberî yo ke bi KHKyî amebî padayîş Erdogan Alayumat û xebatkarê rojnameyê Ozgurlukçu Demokrasî Serkan Erdogan zî estî, seba payan ser de hûmare nêdayî, hetê davîst gardîyanan ra ameyî derbkerdiş û erdî ra ameyî kirantiş. Babete ser o Avûkat Tugay Bekî qisey kerd.
Bekî va ‘2ê teşrîna verêne de davîst gardîyanî şîyî odeyê muwekkîlanê mi û waştî ke wa bikewî rêze û hûmare bidî’ û wina dewam kerd: “Wexto ke muwekkîlê mi reaksîyon nîşan dayî, hetê gardîyanan ra bi kulmike û paşkulan ameyî kutiş. Kutişo ke mîyanê koguşî de dest pêkerdo, dima ra malta de domîyayo. Bitaybetî Alayumat û Zekî Çîçek erzîyayî odeyo sîngerin. Wexto ke Alayumat erzîyayo nê odeyî, cilê ci ameyî vetiş. Wexto ke gardîyanan Alayumat derb kerdî, henekê xo kerdî û vatî ‘rojnameger, nînan zî binuse’. Nê kerdişî heme bi talîmatê muduro yewin û dîyin yê zîndanî ameyî kerdiş.”
Rapor nêdîyayo hepsîyan
Kutişî ra dima hepsîyî bi hawayo nuştekî seba ke xo nîşanê doktorê zîndanî bidî, muracatê îdareyê zîndanî kenî. Bitaybetî Alayumat derbî ver goşê ci de problem vejîyayo. Ame musayîş ke tena 2 hepsîyan rê destûr ameyo dayîş, labelê doktor zî hepsîyan nêerşaweno nêweşxane. 3ê teşrîna verêne de pêvînayîşo akerde estbîyo û pêvînayîşî ra ver seba ke hepsîyî keyeyê xo ra nêvajî ameyî tehdîtkerdiş. Rojnameger Serkan Erdogan zî seba ke erîşa xo tira nêkerda, ameyo derbkerdiş. Nê zî qîm nêkerdî, derheqê hepsîyan de bi taybetî zî derheqê Erdogan Alayumat û Zekî Çîçekî de bi îdîaya ‘teşwîqkerdişê serewedaritişî’ tehqîqat dîyayo destpêkerdiş.” Avûkat Bekî dîyar kerd ke ê hedîse gerreyê Serdozgerîya Komare ya Tarsusî kerdo.
MA/MÊRSÎN