Çemê Cendere ke çimeyê xo awa Firatî ra gêno û qezaya Kahta ya Semsûrî de yo, seba ke baraj û HESî yenî viraştene, ver bi ziwabîyayîşî şono. Nika viraştişê tayê HESan dewam keno û yeno texmîn kerdene ke eke nê HESî biqedyî, çem do bi temamî ziwa bibo. Nê çemî ser o Pirdê Cendere ke wextê romayijan ra mendo, wayîrê rindîyêka girde yo. Welatîyî germê hamnanî ver, seba ke honik bibî xo erzenî nê çemî. Reyna no çem lazimîya awe ya xeylê cayan pê ano. Şarê herême ziwabîyayîşê çemî ver gerrekar o û wazeno ke wa çareserîyêk bêro dîyayene. Welatîyan ra Azîz Bulbul zî tîya de cuyeno û hêgaya ci esta. Bulbulî va ‘tena çem nê, vîrardişê ma zî yenî çin kerdene’ û wina va: “Tîya de vîrardişê xeylê kesan estî. Seba pereyî cayê winasî yenî çin kerdene. Eynî wext de bi no hawa reyê ma zî yenî çin benî.” Wa turîzmî teşwîq bikerî Ahmet Yaşarî zî dîyar kerd ke viraştişê Barajê Ataturkî ra ver Çemê Cendere bi hawayêko şid herikîyayêne û wina va: “Hamnanan bi seyan merdimî ameyêne tîya seyran. Nika zaf kesî nînî. Viraştişê HESan çîyo tewr xirab o. Seba qezençkerdişê pereyan HESan virazenî. Madem wazenî pere qezenç bikerî, o wext herinda baraj û HESan de wa turîzmî teşwîq bikerî.”  MA / SEMSÛR