Taxanê Lalebey û Alîpaşa yê qezaya Sûrî ya Amedî de rijnayîş dewam keno. Taxa Alîpaşa ke 6 rojî yo binê abluqa de ya, bi aşman o cereyan û awa înan ameyî birnayîş, la taxijî fek keyeyê xo ra veranêdanî.
Baroya Amedî, Odeya Tabîban ya Amedî, endamê DBP û HDPyî bi Platformê 'Rijnayîşê Sûrî rê Nê' şî zîyaretê sûrijan û dima ra îzehetêk ame dayîş.
'Awanîyê tarîxî yenî rijnayîş'
Serekê Baroya Amedî Ahmet Ozmenî îzehetî da û wina va: "Ma bi hemwelatîyê ma yê ke taxê ke maya xo ra bîyê û wazenê ke ewja de bimirî, pêvînayîş kerd. Ez wazena netîceyê pêvînayîşî û cigêrayîşê ke ma kerd rayapêroyî rê pare bikera. Sûr wayîrê awanîyanê tarîxî yo. Sûro ke Lîsteya Mîrasê Kulturî yê UNESCO de ca gêno, nika bi nameyê vurnayîşê bajarwanî yeno rijnayîş û rantxuran rê yeno pêşkêşkerdiş."
Ahmetî, peynîya qiseykerdişê xo de veng da selahîyetdaran û dîyar kerde ke ê do sey Baroya Amedî semedê Sûrî têkoşîn bidî û wina va: "Nê keyeyî heme awanîyê tarîxî yî û ewro bi kepçe û dozeran yenî rijnayîş. Labelê şar keyeyanê xo terk nêkeno û nêvejîyeno."
AMED