Barzanî-KDP bira yî ya zî neyar î?

Ser hêrîşê KDP ya Şengalî zaf qiseykerdiş benî. Tayî vanî “Şerê birakujî!” yo, tayî vanî “Şerê îxanetî yo!”

Goreyê mi, nê hûrdî namekerdişî zî rast nîyê.  Beyntarê di birayan de şer bibo, ayê şerî ra vanî, “Şerê birakujî”. Keye Barzanî, birayê kurdan nîyê ke,  şerê ke hembere kurdan kenî yew ayê şerê rî vajo “Şerê birakujî “. Keye Barzanî aye ke ser KDP (PDK) vindenî, kurd nîyê.  Yew bira, birayê xo ra bibiryo şêro hetê dişmenî de ca bigîro, şerê birayê xo bikero, ayê şerê rê vanî, “Şerê îxanetî”. Rîwalo ke Barzanî-KDP birayê kurdan nîyê, şerê înan hembere Kurd û Kurdistanî nêbeno şerê îxanetê. Şerê Barzanî-KDP, şerê neyartî yo. Çunke Barzanî-KDP neyarê kurdanî.

Barzanî-KDP heta nika bi însîyatîf û qerarê xo yew gule nênawo dişmenî ra. Tim û tim hembere Kurd û Kurdistanî şer kerdo. Mustafa Barzanî, awankerdişê Komare Muhabad de Serokê Arteşê Muhabad bi. La wexto ke Îran hêrîşê Muhabad kerd Mustafa Barzanî verê herkesî Komare Muhabad vera da, rema hetanê Rusya şi. 

Barzanî-KDP’yîyan, serranê 1962 û 1975 de qey Îrane hembere KDP-Î û Iraqî şer kerd. Barzanî-KDP, serra 1968 fermandarê pêşmergeyê KDP-Îran Silêman Mauînî kişt, termê eyê berdê teslîmê Şahê Îran û Îranê kerd. Mesûd Barzanî ser nê kiştişî vano, “Raşta Silêman Mauînî kişt, terme eyê berd teslîmê Îran kerd.” Wexto ke karê Barzanî-KDP’yîyan qey Îranê xelasîya, Îran çekê xo KDP re girewtî. Barzanî û KDP’yîyan, şarê kurd yê Başurê Kurdistanê teslîme Saddamî kerd û  remayê şîyê Îrane.  Mustafa Barzanî heta Amerîka şi û uca de merd. 

Wexto ke Barzanî-KDP’yîyan 1975 de hembere şarê kurdî xayîntî kerd, Kurdistan vera da û remayê, tayî kurdan zî newe ra xo rêxistin kerd. Bi nameyê YNK (Yekîtîya Nîştimanî Kurdistan) yew rêxistina newe awan bî. Barzanî-KDP’yîyan awankerdişe YNK hezm nêkerd. Barzanî û dewleta tirk bîyê yew, Koyê Kato û Kaşura yê ser Botanî de hêrîşe pêşmerge kerd. 700 pêşmerge şehît vistî. Barzanîyan fermandare pêşmerge YNK Êlî Eskerî Koyê Kato de pê roketê RPG kişt.

Neyartîya Barzanî-KDP’yîyan tena bi nînan sînordar nîya. Barzanî-KDP’yîyan 1988 de zî dema ke komkiştişê Helebçe bi, Kurdistan vera da remayî. 1991 de zî Barzanî-KDP’yîyan Kurdistan vera da remayî. 2014 de zî Şengal de Barzanî-KDP’yîyan yew sîlah nêteqna, Şengal teslîme çeteyê DAÎŞ yê tirk kerd remayî.

Zewbî zî Barzanî-KDP’yîyan 10 hezar eskerê dewleta dagirker yê tirk berdo kerdo Başurê Kurdistanê. Seba înan çîyêk nêvanî. La hêrîşê şervanê Kurd û Kurdistan û Şengalî kenî. No çî ne birakujî,  ne zî îxanet o.  No çî neyartîya  Kurd û Kurdistanî yo. Dişmenîyê Kurd û Kurdistanî yo. Xora Barzanî û KDP neyarê Kurd û Kurdistanî yê.