15ê Teşrîna verêne de artêşa Iraqî û hêzê Heşdî Şabî hêrişê Kerkûkî kerdî. Bêxera tayê gerîlayî û pêşmergeyê zerrîwaştoxan ti kes Kerkûk de xover nêdaybî. Pêşmergeyê PDK û YNKyî fek pawitişê bajarî ra veradaybî û remaybî. No remayîş bîbî sebeb ke Kerkûk û çend bajarê Başûrê Kurdistanî bêrî dagîrkerdiş.
Cinîyê Wanî derheqê na rewşe de qisey kerdî û qala îxanetî kerdî. Cinîyan ra Saîme Surmeye dîyar kerde ke kurdî bi serran o ke Rojhelato Mîyanên de xover danî û wina va: “Çîyê ke Kerkûk de ameyî cuyayîş, nînê qebulkerdiş. Beno ke cinîyî reyna qetlîyam, tecawiz û sewbîna reyde têrî bimanî. Ganî şarê kurd yewîya xo awan bikero û pawitişê xo bikero.”
Lazim o şar herra xo nêterikno
Rafîya Cîvakliye zî va ‘bi serran o ke kurdan ser de polîtîkayê zextî estî’ û wina dewam kerde: “Barzanîyî heme qezencê şarî teslîmê Heşdî Şabî kerd. Ganî bi ti hawayî şarê Kerkûkî fek herra xo ra veranêdo. Ma eşkenî pawitişê xo bikerî. Senî ke ma Şengal û Kobanê de xo pawit, ma Kerkûk de zî eşkenî xo bipawî.”
Îxanet do nêro vîrîkerdiş
Kiymet Çîçeke zî va ‘hêzê emperyalîstî nêwazenî kurdî bibî wayîrê statuyêkî’ û wina domnaye: “Ganî kurdî bibî yewe û nê hêrişan rê bibî cewab. Şarê Şengalî bi hêzê xo pawitişê xo kerd. Nika Şengal, Kobanê û Reqqa DAIŞ ra ameyî pakkerdiş. Şarê kurd şarêko xoverdakar o. Eke kurdî bibî yewe eşkenî serbikewî. Labelê kurdî do nê îxanetê Kerkûkî xo vîra nêkero.”
JINNEWS/WAN