Dayikê Şengal’î yê ke hêrîşanê çeteyanê PDK-AKP rê nêrazîbîyayîş damûsnay, ardî ziwan ke ‘Barzanî sifte înan rote DAIŞ, nika zî roşeno Erdogan’î. Dayikê Şengalî ardî ser ziwan ke PDK onca wazena ferman bîyaro ser înan û aşkere kerdî ke iyê dê vernîya nayî de vinderê.
Dayîkan ra Xezal Silo vist vîrî ke çeteyanê PDK hêrîşê war û hardê înan kerdo, nayî ra cinî û domanî zaf tersîyayê. Silo aşkere kerd ke nê hêrîşan qetlîama 3ê Tebaxe ard vîra înan û wina va: “Pêşmergeyê ke ameyê zey çeteyan ê û ma tersenê ke zey çeteyanê DAIŞ keynay û cinîyanê ma biremnê. No çîyo ke pêşmergeyî ewro ser ma de ferz kenê şerm û eyb o. Ma qebûl nêkenê pêşmerge reyna ser waranê ma hukmê xo ferz bikerê. Senî ke 3’ê Tebaxe de keyney û cinîyê ma remnay, camêrd û xortê ma kiştî wazenê nika zî eynî çîyî bikerê. Heta ke yew Êzidî bimano do emelê xo bi pêşmerge û Barzanî ra nîyaro.” Dayîk Xezal Silo aşkere kerd ke eke pêşmerge raştî de wazenê înan bipawê wa kerem bikerê şirê bi desan dewanê Êzidîyan vakurê Koyanê Şengalî de destê DAIŞ ra bixelesnê.
PDK wextê fermanî de kotî de bi?
Dayika bi nameyê Berfê Îlyas zî hayr ant 3'ê Tebaxe ser û na pers PDK rê kerd: “Wexto ke ma verday û remayî, dayîk û keynayê ma destê DAIŞ de mendî ê kotî de bî? Çira o dem şima ma verday û ma nika amey vîra şima. Çeteyê tewr gird pêşmerge bi xo yê. Zey doman, genc pîr ma xo bi xo pawitişê xo kenê. Heta ke ma bicuwîye, ma dê ti wext pêşmergeyan mîyanê xo de qebûl nêkerê. Ma Êzidîyê verênî nîye, ma keyna, doman, cinî û dayîkê xo perwerde kerdî. Ma cinî zî ma dê pawitenê xo bikerê.”
Îlyas vist vîrî ke senî ke Barzanî û DAIŞ ser ma de peyman viraştî, nika zî Barzanî û Erdogan ser şarê ma yê Êzidî peyman ferz keno û wazenê fermana 73. temam bikerê. Îlyas aşkere kerd ke na qorî zî Barzanî Şengal rote Erdogan’î û ard zon ke iyê dê destûr nêdê ke çeteyê Barzanî jû gam zî ravey bîrê.
ŞENGAL