Keyeyê Barzanî bîyê belayê sere şarê kurd û Kurdistanî. Hina yew belayê ke bela zî nîyê, belayê qerbelekî yê. Sey kurd aysenî la eslê xo de kurd nîyê. Sey qey (seba) şarê kurd û Kurdistanî têkoşîn kenî aysenî la rastîya înan hina nîya. Ça de neyarê kurd û Kurdistanî estî uca de keyeyê Barzanî û hetkarî înan vejîyenê werti.
Hetê şarê kurd de nê, hetê dagirkeran gênî. Nika zî hinayo. Dewleta tirk ra zêdayîr neyartîya PKK û kurdan kenî. Eskerê tirk berdo, Başûrê Kurdistanê de ca kerdo. Eskero ke berdo bi ca kerdo, uca de taybet hetê Dihoqî de noktayê sanayîşî, yanê noktayê kontrolî awankerdî. Ser nayî nokta de şarê kurd kontrol kenî. Na hayî hem ANF de vejîya hem zî hema hema pêronê çapemenîya muxalîf ya Başûrê Kurdistanî de amê weşanayîş .
Hadê ma raştî bidê kiştek. Hêrsbîyayîşê PDK seba çekê ke Amerîka dayî YPG-QSD qey çi yo? Ma fam kerd AKP û dewleta tirk dişmenê. Vanî ma nêwazenê Trump çekan bido YPG. La hêrsê PDK seba çi yo? Çira çeteyê PDK yê bi nameyê ENKS û serek çete Îbrahîm Biro beyanat danî û vanî çekan medê YPG?
Ma nayî zî berzê yew kişt. Çi karê lajê Mesûd Barzanî Mesrûrî Amerîka de esto? Wexto ke R.T.Erdogan şino Amerîka, eynî wextî de Mesrûr Barzanî û Fuad Huseynî zî şinê Amerîka. No çiyo ver xo nîyo. Hina ayseno ke Erdogan, Mesûd Barzanî ra vato, wa şima ra zî yew heyet şêro Amerîka û Amerîkayijan ra vajo çekan medê YPG. Teberê nayî de çîyêk çin o. Kar û xebatê Keyeyê Barzanî û KDP neyartîya kurd û Kurdistanî yo. Şarê kurd, têkoşîn keno, neyaran Kurdistanê ra vejeno. La Keyeyê Barzanî zî desto nanê ser pêronê erjayîyê şarê kurd û kenî barê xo. Şarê kurd gan û gonî dano. Keyeyê Barzanî zî ser gan û gonîya şarê kurdî xo danê ciwîyayîş. Kar û xebatê Barzanîyan no yo. Vanî ya,”Kam kerd, kamî werd!” Eynî sey nê vateyê verênan o.
Nê derheqî de yew şanik û vistonek zî esto. Yew biewnê na şanike rastiya Barzanîyan hîna hol eşkera beno. Ha şanik ha rastîya keyeyê Barzanî.
“Cuwîyayîşê Şîrik
Beno, nîbeno. Yew luyê, yew tajî, yew şêr û yewî verg benî. Pîya yenî pêser yew kombiyayîş kenî, pêameyîşêk virazenî. Gorê nê peameyîşî kom hew, sed bikero gera o sed biyaro û yewbînî ra parîbikerê.
Yew rojê, verg yew vîtik sed keno, seba parîkerdiş ano. Şêr, vîtik keno çar lete, parê tewr gird û weş xo ra gêno, vano; “No parê şêrî ê min o.” Seba leteyê diyîn zî vano; “Miyanê ma de dostê tewr rind kamo wa no lete zî ê eyê bo.” Dewam keno vano; “Mîyanê ma de mi ra weşêr yew çîn o” û bi nê qise leteyê diyîn zî xo rê gêno. Vano goreyê qanune leteyê hîrêyîn zî ê min o, kam bawer nîkeno wa kîtab akero û biewno. Wexto ke dor yena leteyê çarin zî vano; “Kam destê xo derg bikero, ez sereyê êyî birnena.”