Başûrê Kurdistanî de şar krîzê sîyasî, leşkerî û ekonomîkî ver 18ê kanûne de vejîyabî raşteyan û reaksîyon nîşanê hukmatê Başûrî daybî. Serewedarnayîşê şarî hîna zî zaf cayan de dewam keno û herke şono reaksîyonê şarî hîra beno.
Germîyan, Silêmanî, Hewlêr, û Helebçe de şar payan ser de yo û wazeno ke hukmat îstîfa bikero. Şar raşteyan de rayîran trafik rê padayo û sloganan erzeno. Şar bi taybetî polîtîkayê şaşî yê hukmatî protesto keno. Tayê cayan de çalakgêrî sloganê ‘Ma heqê xo wazenî û heta ke heqê xo bigîrî, ma do çalakîyanê xo bidomnî’ erzenî.
Bitaybetî Silêmanî û tayê cayanê bînan de hêzê asayîşî seba ke vernîya çalakîya şarî bigîrî, tayê cayan girewtî binê abluqa. Ame musayîş ke Silêmanî de 3 kesî birîndar bîyî û birîndarî neqlê nêweşxaneyî bîyî. Reyna Kifrê de hêzê asayîşî ser çalakgêran de gule reşanayî. Çalakgêrî bînaya merkezî ya Cepheyê Tirkmenî (ITC) veşnayî.
Babete ser o hukmatê Başûrî îzehetêk da. Hukmatî dîyar kerd ke heqê şarî yê protestoyî esto, la hedefgirewtişê dezgehan raşt nîyo. Labelê hetê hukmatî ra derheqê hêvîyê şarî de çîyêk nêame vatiş.
NAVENDÊ XEBERAN