Namzedê HDPyî yê serekkomarîye Selahattîn Demîrtaş : “Helbet ma îdareyêko winasî heq nêkenî, no qederê ma nîyo. Ganî ma pêro pîya Tirkîyayêka newe awan bikerî. Wa bawerîya şima bibo.” Bêxêra Namzedê HDPyî yê serekkomarîye Selahattîn Demîrtaş ke Zîndanê Edîrne de tewqîfkerde yo, heme namzedê serekkomarîye, her roje cîya cîya cayan de vejîyenî şarî ver û propogandaya xo kenî. Labelê Demîrtaş nê heqî ra mehrûm ameyo verdayîş. Demîrtaş zî seba ke propogandaya xo bikero bi rayîrê telefonî qiseykerdişê xo yê mîtînge kerd. Demîrtaşî heqê xo yê telefonî de qiseykerdişê xo yê mîtînge kerd û bi no hawa hem mesajê xo da û hem zî şarî vengê ci eşnawit. Demîrtaşî qiseykerdişê xo yê telefonî ke wextê ci sînordar o de mesajê muhîmî dayî. Demîrtaşî qiseykerdişê xo de selam û heskerdişê xo herkesî rê erşawitî û wina va. “Ez nizdîyê 20 aşmî yo ke bi hawayo bêhuqûqî tîya de tewqîfkerde ya. Heta ewro derheqê mi û embazanê mi de mehkemekerdişêko adil nêame viraştiş û heme mehkemeyan ser o zextê sîyasî ameyî kerdiş.” Bêedaletîye heme cayan de esta Demîrtaşî va ‘tîya de dest û polê mi beste yî û her roje televîzyonan de îftîrayan erzenî mi’ û wina domna: “Tîya de heqê mi yê cewabdayîşî daxî çin o. Labelê şima heme çîyî vînenî. Rewşa tena nimûne ya. Bêedaletîye tena qesranê edaletî de nê, nêweşxane, unîversîte, hêga, fabrîka û sewbîna zaf cayan de bena. Çi heyf ke Tirkîya açarîyaye zîndano akerde. Ewro wina bîyo ke komelê Tirkîya bextewar nîyo û bêhêvî yo.” Sewbîna Tirkîya mumkin a Demîrtaşî qiseykerdişê xo de qala Tirkîyaya alternatîfe kerd û wina va: “Helbet ma îdareyêko winasî heq nêkenî, no qederê ma nîyo. Ganî ma pêro pîya Tirkîyayêka newe awan bikerî. Ewro roja tersî nîya. Ma do merdiman goreyê nasname, mezheb û cînsîyetî cîya nêkerî. Ma do polîtîkaya ke 81 mîlyon merdiman verik kena, bidomnî. Şar welatêko dewlemend de feqîrî anceno. Ma do şarê xo nê şermî ra bipawî. Demîrtaş şima yî. Wa bawerîya şima bibo. Yew ray bidê HDPyî, yew ray zî bide Demîrtaşî. Xo vîra mekerê, yew ray heme çî bedilnena. Ez silam û heskerdişanê xo şima rê erşawena. Ma do bi tesilî qezenç bikerî.” MERKEZÊ XEBERAN