Heyetê Weçînitişî yê Berzî (YSK) goreyê qerarê AKPyî hereket kerd û 6ê Gulane de weçînitişê Stenbolî betal kerd. Vera qerarê YSKyî de her kes şono reaksîyonî zêde benî. Temsîlkara berze ya Karanê Teberî û Polîtîkayanê Asayîşî Federîca Mogherînî û Endamê Hîrabîyayîşî yê Komîsyonê Yewîya Ewropa Johannes Hahnî zî tede xeylê kesan vera qerarî de reaksîyon nawit.
Mogherînî va ke ‘Bicaardişê prosesê weçînitişêkê azad û şeffafî hem seba demokrasîyan û hem zî seba têkilîyanê Yewîya Ewropa û Tirkîya xeylî muhîm o’ û wina domna: “Seba çimdarîya weçînitişo ke ameyo kerdene, kîşta Kongreya Rayberanê Herêmîyan ê Konseya Ewropa de ganî çimdarê mîyanneteweyîyî zî bêrê dawetkerdene.” Sekreterê Pêroyî yê Konseyê Ewropa Thorbjorn Jaglandî zî bi rayîrê vervatoxê xo dîyar kerd ke qerarê YSKyî beno ke zirar bido bawerîya weçînitoxan.
Raportora Parlamentoyê Ewropa ya Tirkîya Katî Pîrî zî va ‘Erdogan binkewtişî qebul nêkeno û vera îradeyê şarî de vejîyeno’ û wina dewam kerde: “AKPyî seba dibarebîyayîşê weçînitişê Stenbolî YSKyî rê zextî kerdî. No hal zî ramojneno ke bawerîya bi weçînitişî nêmenda.”
ANF / BRUKSEL