GULÎSTAN AZAK / JINNEWS / MELETÎ
Kemal Kurkut 21ê Adare de Meletî ra seba ke şêro Newroze vera xo dabî Amed û Cehdeyê Evrîm Alataşî ser de hetê polîsan ra amebî qetilkerdiş. Qetilbîyayîşê Kurkutî ra 7 aşmî dima îdîanameyo ke derheqê Kurkutî de amebî amadekerdiş, hetê Mehkemeya Cezaya Girane ya 7. de ame qebulkerdiş.
Îdîaname de seba polîs Y.Şyî sucê ‘bi hawayo qestî kiştişê merdimî’ ver cezaya muebedî ame waştiş, labelê ame tehlîyekerdiş û derheqê polîs O.Myî de zî qerarê bêtaqîbî ame dayîş. Ame musayîş ke avûkata keyeyî Reyhan Yalçindag Baydemîre seba ke polîs Y.Ş bi hawayo tewqîfkerde bêro mehkemekerdiş, do waştişname bido.
Babete ser o dayîka Kemal Kurkutî Sîcan Kurkute va ‘Kemal û Ozgecanî bi hawayo rehet nînî pîlkerdiş’ û wina dewam kerde: “Heta nika xeylê domanê ma ameyî qetilkerdiş. Çi ceza bêro dayîş wa bidîyo, yê ke şîyî êdî tepîya nînî. Eke fotografî nêvejîyayênê, o wext do lajê mi sey terorîst biameyêne nîşandayîş. Heme raştîyî erey an zî rewe vejîyenî raşte.”
Bawerîya mi çin a
Kurkutî dîyar kerde ke sey aye xeylê dayîkê ke domanê xo vînî kerdî estî û wina va: “Bawerîya ma bi edaletê yê ke dayîkan domanan ra cîya kenî rê çin a. Polîsê ke Kemalî qetil kerdî ra yewe rê cezaya muebedî yeno waştiş, labelê polîsêko bîn hetkarîya ê polîsî keno. Labelê polîso ke hetkarî dayo rê qerarê bêtaqîbî yeno dayîş. Ma do senî nê huqûq û edaletî ra bawer bikerî? Şirnex de polîso ke 2 domanan qetil kerd, serbest ame veradayîş. Heta ke domanî bêrî qetilkerdiş, ez do Kemalê xo bîyara vîrê xo.”