ŞEHRÎBAN ASLAN/JINNEWS/AMED 


Hemsereka Pêroyî ya DBPyî Sebahat Tuncele 4ê Teşrîna peyêne de çarçewaya operasyono ke vera hemserek û parlamenteranê HDP û DBPyî de amebî kerdiş de tepişîyaye û 2 rojî ra dima zî tewqîf bîye û erşawîyaye zîndan. 

Tuncela ke aye roje ra nata tewqîfkerde ya, Zîndanê Tîpa Fyî yê Kandira ra mektûbêk erşawite û derheqê statuyê kurdan û çareserîya problemê Rojhelato Mîyanên de nuşte. 

Tuncele mektuba xo de va ‘Rojawan tarîtîya Rojawanî de sey tîje akerdo’ û wina dewam kerde: “Mîyanê şer, kaos, pêrodayîş û sewbîna de sîstemêko ke azadîya cinîye, ekolojîk û demokratîk yeno awankerdiş. Rayîrê mîyanê krîz û kaosê Tirkîya ra vejîyayîşî xebate û hêvîya ke ameya awankerdiş a. Nika girdkerdişê na hêvîye wezîfeyê ma hemînan o.”


Îqtîdar şarî bêrayber verdano

Tuncele dîyar kerde ke îqtîdarî şarî bêrayber verdanî û bi no hawa hêvîya şarî şiknenî û wina domnaye: “Cok ra îqtîdar îradeya şarî xesp keno. Komelî ra vano ‘bêxera ma, ti şansêko bîn yê şima çin o’. Tewr peynî çîyê ke cenazeya dayîka Hatune de vejîyaye zî nîşanê ma dayî. Ewja de ame vatiş ke ‘şima rê misqalêk herre daxî çin o’. No zîhnîyet newe nîyo. Cewherê planê înan de çîyo esasî bê nasname, heq û azadî verdayîşê şarêkî esto. Kesê wayîrê nê zîhnîyetî vera xoverdayîşê ciwan, cinî û pêroyîya şarî de vînî kerdî. Rayîrê nê krîzî ra vejîyayîşî, kurdan reyde awankerdişê têkîlîyêka demokratîke yo.” 


Wa çimê faşîzmî kor bibo

Tuncele dewamê qiseykerdişê xo de daye zanayîş ke herçiqas ke demo kilm de mumkin nêaso zî, kurdî do peynîya peynî bi xo qederê xo dîyar bikerî û wina va: “Kurdî do şaranê Rojhelato Mîyanênî reyde nîzamo azad û seyyewbînan awan bikerî. Eynî sey Rojawanî. Labelê no het de çi heyf ke ez nêşena bi hawayo aktîf ca bigîra. Wa çimê faşîzmî kor bibo.”


Berpirsîyarîya herkesî esta

 Tuncele bale ante prosesê ameyoxe ser û wina qedênaye: “Proseso vernîya ma do hîna zehmetin bibo. Çimkî Rojhelato Mîyanên de dengeyî newe ra yenî ronayîş û seba nê krîzî ra vejîyayîşî do têkoşînê hîna girdî bêrî dayîş. Çîyo ke tesilî bîyo, no yo ke Rojhelato Mîyanên de êdî bê kuran çareserî mumkin nîya. Cok ra ganî ma hewldayîşêko gird bidî. No het de berpirsîyarîyêka girde kewena milê herkesî. Ez bawer kena ke kedkaranê partî şarê ma yê Amedî silam kena.”