Rayverê Şarê Kurd Abdullah Ocalan zî Îmralî de xo ver da û oca de zî Şarê xo rê Ravertî kerd. Roja 15ê Sibate a ke mîyanê Kurdan de sey roja sîya yena vînayîş emserr zî sere de Kurdistan û heme dinya de yena şermezarkerdiş. Kurdistanijî ke Awrupa de cuyenê semedê şermezarkerdişê Komploya Netewî Şaristanê Frankurt, Luksemburg û Bernî ra ver bi Şaristanê Fransa Strasbourg kewtê rayîr. Rayşîyayîşo ke 2ê Sibate ra nata dîyayo dest pêkerdiş pê coşêko pîl dewam keno. Siyasetkaro Kurd Sezaî Ûçar o ke rayşîyayîşê Luksemburg-Strasbourg de ca girot îzeh kerd ke vîzêr ra nata 57 bajar, bajarok û dewan ra vîyartê û her ca de şar pê coşêko pîl ameyo înan ver.
Sehezarî herîkîyenê
Hezaran Kurdî ke 2ê Sibate ra nata rayîyan de yê wazenê eleqeya heme dinya biancî Komploya Newtewî ke Ocalanî ra virazîyaya ser. Rayşîyayîşo derg o ke çendêk şino hîra beno Strasbourg de qedîyeno. 15ê Sibate de Şaristanê Fransa Strasbourg de pê beşdarîya sehezaran kesan mîtîngêko pîl virazeno.Şaristanê Baskî zî Ê Şaristanan ra yew o. Oca de zî hezaran welatî kewtê rayîr û nika resayê Şaristanê Fransa St. Avold. Her çendêk zî vewre varena, rayşîr beno zehmet la rayşîyayîş pê heme qewetê xo dewam keno û na zehmetî xemê tu aktîvîstî de nîya. Aktîvîstê rayşîyayîşî pê coş û heyecanêko pîl ver bi Strasbourgî şinê. Aktîvîstê rayşîyayîşî ke çend rojî ke rayîran de yê pê çepik û tîlîlîyan yenê oxirkerdiş. Aktîvîstê ke nê 7 rojî ke 165 kîlometre rayîr ra şîyê wazenê wa kesê ke Ewrupa de manenê beşdarê ney rayşîyayîşî bibê û bêbextîya ke rayverê Şarê Kurd Abdullah Ocalanî ra virazîyaya şermezar bikerê. Hedrekaran ra, TEV-ÇAND, Tevgera Îslamî, Federasyona Elewîyan, Federasyona Êzidîyan û TJKE mîyanê xo de yenê têhet û semedo ke wa rayşîyayîş hina zêde qewetin bivêro mîyanê aktîvîstan de gêrenê û moral danê aktîvîstan. Kişta bîne ra Şaredarê Loupenshause zî aktîvîstan zîyaret kerd û xoverdayîşê Kurdistanijan silam kerd. Şaredar oca de xitabê aktîvîstan kerd û vat ‘Şima xeyr ameyê. Ma bi ameyîşê şima sereberz ê. Yeno pawitiş ke sehezaran kesî nika her cayê ewrupa ra kewtê rayîr beşdarê mîtîngê Strasbourgî bibê û Komploya Netewî lenet bikerê.
ANF/RASSAT