Ma bi xêr dî, Bülent Arınç. Endî vejiya werte, bî zelal.
Zerrê her azayê hukumatî de jû Idris Naim Şahin esto.
Zerrê Bülent Arınç de zî jû Idris Naim Şahin esto.
Tolê xo melayîm û dîndar, dendikê xo sert û faşîst.
Ey bêmedeniyet Bulent!
Dewleta to ke zonê Yılmaz Güneyî qedexe nêkerdenê, sînema to nêbiyenê.
Dewleta to ke zonê Yaşar Kemalî dest ra nêguertenê, edebiyatê to nêbiyenê.
Dewleta to ke zon û kulturê kurdan serbest biverdenê, Mustafa Erdoganî ‘Anadolu Ateşi’ nêvirastenê, ‘Agirê Kurdîstanî’ virastenê.
Ma ke çeverê xo simarê ranêkerdenê, Tirkiya to nêbiyenê.
Ti çitur medeniyet ra qesey kena, bêedev. Çiyo ke ti kena, neqiye niya, bêheqî ya.
Rind ke ma jê to medenî nîme. Rind ke ma keşî înkar nêkeme, rind ke ma zonê keşî qedexe nêkeme, rind ke ma kulturê keşî qiz nêvîneme. Hama nî pêro medeniyetê to de estê.
Qiz vînitene, qedexe kerdene, kulturanê bînan binê zor û zorvajiye guretene.. Medeniyetê to na wo, Bülent beg! Heq çiyo niyanen nasivê ma nêkero.
Ti wayîrê tewayî nêbiya, sarê bînî ti gureta zerre, torê wayîr vejiya, ebi kulturê rindekiye ti qebul kerda, roza tenge de ebi tora piya mereve de dapêro, ti sevekna.
Nika ti vejiya, na kulturê rindekî û rindiye qiz vînena, medenî nêvînena.
Zonê kurdî de perverde bi qalîta nêbeno heya!!!!
Ma ala reye pelga jû kitavî biwane û zerrê na pelge de çond çekuyê tirkî estê, bimore û mara vaze. Dima perverde û medeniyetî sero qesey bikerîme.
O waxt herhalde hîrê to sono ginena waro. Ferq kena ke to çiqas dizdiye kerda, zonê to se ra çiqas zonê tu yo.
Ma se vajîne Bülent beg!
Kam bisermawo?
Ti nêsermayena, çike riyê to de rêça raştiye nêmenda.
Riyê to nêdezeno, çike ti mordemo kamil niya.
Kam bisermawo?
Sîmsaro ke domonanê ma rusneno TRT6, o bisermawo.
Domonê ma yê ke ti kulturê înan qiz vînena, medenî nêvînena, onca zî torê TRT6 de xizmete kenê, î bisermaye.
Hunermendo kurdo ke tora vano, ‘Bülent Arınç mordemo de ramanî yo’ o hunermend bisermawo.
Xizmetkarê tu yo kurdo ke meclîse de des reye pêsero vano ‘Dobrovskî, Dobrovskî…..’ nêşîkîno vazo Roboskî, o bisermawo.
Çond sey serra medeniyetê to cerebeneno ke ma û kulturê ma werte ra wedaro, hama sernêkewt. No torê derd bo, Bülent beg!
Na rîwal ra ma sareberzîme.
Honde mexmuriye meke! Herd mîl o, heq tora pîl o, Bülent beg!