Rojnameyê Cumhuriyet’î badê werte vetinê dîmenê ki AKP bi kamyonan cebilxane rêşena çeteyanê Rojawa û Sûriye, belgeyê newey vistî dest. Xebera qalkerdî de xeylê agahiyê muhîmî estê û mûsnenê ki AKP kirêştoxînê çeteyanê DAIŞ ê nêşayê ravêrê Kobanê kena. Goreyê xeber, Saziyê Îstixbaratê Tirk MÎT, bi otobusanê ciya, çete û tifîngan Reyhanli ra benê qezayê Riha Kaniya Xezalan û wija ra jî ravêrenê Girê Spî.

Eno biyayiş jî, 9’ê çileyê 2014 de ameya meydan. Goreyê xeber, polîsan, jew îxbarê otobusan de madeyê narkotîk esto ser, 2 otubusî vindarnayê.


‘Karê dewlet kerdo’

La belê cayê madeyê narkotîkî de, xeylê fîşegê bataniya miyan de nimnayniyayê, diyê.Nay ser jî polîsan her 2 otobusî berdê garaj û şofurê înan  Şahîn Guvenmez û Esat Lutfî Er jî girotê binçim.

Enê her 2 şofurî îfadeyê xo de vanê, sûcê înan çiniyo û înan karê dewlet kerdo. Goreyê îfadeyê şofuran, kampa çeteyan ê Atme ya Suriye ki, nezdiyê Reyhanli’ya 73 çetey û xeylê cebilxane berdê qezayê Riha Kaniya Xezalan. Bado jî, wija ra jew keverê taybetî ra ravêrdê Girê Spî ê Rojawa û wija bê bi xo otubus ra bêrê war, çetey ameyê war û cebilxane giroto.

Şofurî vanê Girê Spî de çeteyan û wezîfedaranê dewlet nêviradayo ê cixare jî bişimê û badê vengkerdinê otobusan wija ra aviriyayê, la belê wextê polîsan kontrol kerdo, ferq kerdo heveyê fîşegî otobus miyan de mendê.


Binê kontrolê El Kaîde û DAIŞ de no

Girê Spî bi nameyê bîna Til Ebyed û çoşmeyê ci, wexto lejê zerî ê Suriye dest kerd ci ra na kişt, binê kontrolê El Kaîde û DAIŞ de no. Çeteyê DAIŞ bi sebebo raya mabenê kampa Atme ya nezdiyê Reyhanli û Til Ebyad derg û talukeye, bi destegê quwetanê tirk, bi otobus, tren û wesaîtanê bînana şinê Kaniya Xezalan û wija ra  ravêrenê Girê Spî.

Wexto ki çeteyanê DAIŞ wast Kobanê îşgal bikirê jî, dîmenê hetkarînê dewleta tirk û çeteyan ravînayê çiman ver, vejiyaybî werte.Ê dîmenan ra jew jî, cotmeha 2014 de vejiyabi werte, lejker û çeteyan zey dost sohbet kerdê û bado pêjewîn ra xatir wastê. Çend hefte badê nay jî, çeteyanê DAIŞ 29”ê mijdar de, hetê keverê sînor ê tirka, bi tanq û tifînganê girana êrişê Keverê Sînor ê Kobanê kerd. La belê quwetanê YPG û YPJ bi saetan xo ver da û eno êrişê hetê keverê sînor ê tirka pûç vet. 


NAVENDA XEBERAN