Çewres roj tay wext nîyo. Merdim biwazo çewres roje de eşkeno zehf çîyan bikerdê-bikero. Hukimeta AKP no hîrês serîyo tenê bi serê xo hukimat bi. Sera 2002 ra heta ewro. Heme karê nê welatî û yê nê welatijan hêdî hêdî kerdo. Zehf reyan zî zey kenê nîşan dawo. Sero ewilî de herî zêde pêdivî bi demokrasi bibî. O wext herî zêde semed “Kopenhag krîterî” dekewtişê Ewropa ameyê xeberdayiş. Bi seran zey nê “krîterî” go pêk biyarê qisey kerdêy. Ti çîykêk nêyame kerdiş-viraştiş. Raynê o wext “turban” ameyê xeberdayiş. Bi seran zey mayo nê zagonî bibedelnime amey xiberdayiş. La bi seran tenê ame xiberdayiş. Zey yew bi deste yine girewtbi, nêwerdê zagonan bibedelnê.
Na erdnîgarî sero herî zêde pirsgirêkê kurd, yê kurdan bibî. A zî ma pêro zanê sera 2005 ra heta ewro go ez, an zî ma, partiya ma go na pirsgirêk çareser bikero. La sera 2005 çica, sera 2015 çica des serî ser ra vêrtê ra. Ewro kamco siyasetmedarê an zî qelemşorê nezdî AKP yan nizdî RTEyî vecyen TVyon vatişê RTE yê sera 2005’î vano. Fîneno vîrê nê welatijan. Raşta a sere vat; “Pirsgirêka kurd esta, hewce bikero mawo lêborîna xo biwazime”. Bade nê xeberdayişî ka se kerd. Des serî qey wextêko kilmo. Wexto derg çend serîyo. Emro ti dergê kilmê !
Raşta sera 2005’î de nê vatişî vatî. La bade coy se vat? “Kobanî keeeeewt kuno” an zî “Kobanî çaaa Amed ça”. An zî “Ti nêfikiryê pirsgirêka kurd çinya”. Hemine ra herî girane no weçînayiş de çiyêk amey vatiş. Kamco vatiş şino merdimi vîr-ra? Vatişê verînan: “Weş beno warê xinceran weş nêbeno warê xeberan”. Her vatiş vatişê bînîy giranêr amey vatiş; pirsgirêka kurd çinya. Protokolê Saraya Dolmabaxçe çinya. Muzakera çinya. Hemine giranêrî şiyayişê malbat, parêzeran û yê heyet Îmralîy amey betalkerdiş. Tecrit newera pêk ame.
Sera 2002 ra heta ewro zehf serî vêrtîy. Zehf vatişîy amey vatiş. Zehf xeberdayiş ame kerdiş. La çîkêk nêvirazya, çîkêk nêbedelya. Hetê magazagone ra bedelnayişêk verbiçiman, eysaye nêvirazya. Heme hetê dunyara TV ê kurdan virazyay. Badê coy bê zagon şima zî TRT Şeş an zî bi namê ewroy TRT Kurdî kanalêkê TVî de weşan kenê. Raynê heme niştecihanê Kurdistanî de kurdan bi ziwanê xo sazî û dibistanî akerdî.
Saziya zey TZPa-Kurdî akerde. Semed ziwan û wêje, çand û huner xebat dest pê kerd. Şima ewro çend zanîngehan de beşê kurdî akerdê. Nê çiyêk şima akerdê xo kurdan akerdê. Tenê mekazagonan bibedelnê. Bi ziwanê dayik mafê perwerdeyî mekazagone de wa ca bigero. Dibistanan akerê. Dest bi perwerdeya bi ziwanê kurdî bikerê. Tenê ziwanê kurdî nê heme ziwanêk no erdnîgarî ser hem welatîy qisey kenê bi pêroyine perwerdeyî bêro kerdiş-dayiş. Magazagon virazêy.
Semed nê çiyan zî lazim destê xo şenik bigerê. Vatişîy zêdêrî emel lazim. Vatişêkê verînan esta: “Ti heya hezar nesîhet kenê bibe yew mînakêk”. Weçînayişî ser çewres roje derbas biyo wextêko zehf dergo. Hema zî derg mekerê. Benok seba zehf erey bo!
Nesîp GULTEKÎN