Derheqê referandûmî de Serekê Komeleya 78an yê Şûbeya Amedî Ganî Alkanî qisey kerd. Alkanî va ‘ma sey neslêko şorişger xeylê derbeyan rê şahidî kerd’ û wina domna: “Ma tim bi OHAL û rewşa îstîsnayî rî bi rî mendî. Qanûno bingeyî yo nikayîn zî se ra 80-90 rey girewtbî û amebî qebulkerdiş. Wextê derbe de daxî hende tepiştiş û tewqîfkerdişî nêbîbî. Wextê 12ê êlule de ziwanê kurdî qedexe bî, nika derheqê kurdewarî de heme çî qedexe yo. Qanûno bingeyî yo ke do referandûm de bêro vernîya şarî de menfîetê şarî çin o. Ma do sey komeleya 78an vajî nê.”
Eke ya bivejîyo kaos zêde beno
Alkanî seba çi ê do vajî nê rêz kerd û wina va: “No bedilnayîş yeno manaya pratîzekerdişê KHKyan. Xora 18 madeyî bi hawayo zelal orte de yî. Bi nê madeyan do heme selahîyetî bidîyî kesêk. No kes goreyê zerba xo eşkeno nê selahîyetan bixebetno. Ma nika ra tesîrê nê madeyan vînenî. Xebatê referandûmî seba tayînan qedexe yo û tayînan rê zî serbest o. Her çiqas ke 2 cepheyî estî zî, cepheyê ‘nê’yî raştê hêrişî yeno. Eke ‘ya’ bivejîyo do qaos û şer bivejîyo.”
Cepheyê nê de ca bigîrê
Alkanî peynîya qiseykerdişê xo de wina va: “Ma bi heme xebatkaranê xo seba ke nê bivejîyo, dest bi xebatan kerd. Ma do bi hawayo aktîf bixebetyî û seba ke nê bivejîyo çi destê ma ra bêro, ma do bikerî. Ma heme herêmanê Tirkîya de dest bi xebate kerdo. Bêrê ma cepheyê nê de cayê xo bigirî.”
HULYA EMEÇ / ANF- AMED