Dewleta tirkî vera Başûrê Kurdistanî de hêriş û dagîrkerîya xo domnena. Vera hêriş û dagîrkerîya dewleta tirkî de sere de kurdê Başûr, Rojawan û gerîlayê Kurdistanî û kurdê çar parçeyê Kurdistanî weriştî payan ser. Gerîlayê Kurdistanî dîyar kenî ke kurdî do Qendîl bipawî û şerê Qendîlî do peynîya Erdoganî bîyaro.

Hêriş û dagîrkerîya dewleta tirkî ya vera Başûrê Kurdistanî dewam kenî. 8ê Hezîrane de ciwananê başûrijî vera hêriş û dagîrkerîya artêşa tirkî de çalakîya tirsê ganîye daybî dest pêkerdene û çalakîye aye roje ra nata bêmabên dewam kena.

Her roje cîya cîya vera xo danî Qendîl û destek danî çalakîya ciwanan. Heta nika cinîyê ciwanî, Heyetê KNK, endamê Cepheyê Neteweyî û tewr peynî zî rayberîya Vera Hêrişê Dagîrkerîye de Înîsîyatîfê Şarî de bi hezaran kesî ver bi Qendîlî kewtî rayîr.

Vizêr serê saetanê serê sibayî Dihok, Hewlêr, Silêmanî, Kerkûk, Germîyan, Raperîn, Şarezgor, Kifrî, Xurmatu, Çemçemal, Ranya û xeylê merkezanê bînan de bi hezaran kesî ameyî têhet. Ame musayîş kesê ke beşdarê çalakîye bîyî, do Qendîl de çalakîya ciwanan zîyaret bikerî û îzehetêk bidî çapemenîye.

Wa dewleta tirkî nêkewo xeyalanê vengan mîyan

Heto bîn ra ciwanê ke Qendîl de çalakîye de ca gênî ra Jina Egîde qisey kerde û wina va: “Ez vera zîhnîyeto ke Kurdistan kerda 4 parçe de têkoşîn dana. Ma do vera dewleta tirkî de bi hawayo ciwanî têkoşîn bidî. Ganî bi hawayo lez prosedurê huqûqî bikewî dewre.

Dîlan Musaye zî va ‘ma do vera her tewir dagîrkerîye de bivinderî’ û wina va: “Cayê ke kurdî tede cuyenî de faşîzm do nêşênbo ca bigîro. Cok ra wa dewleta tirkî bîla sebeb nêkewo mîyanê xeyalanê vengan. Ez veng dana heme ciwananê cinîyan; wa bêrî ma pîya erdê xo bipawî.”

Ciwanê Rojawanî zî rasteyan de yî

Heto bîn ra ciwanê Rojawan û Vakurê Sûrîye zî vera hêriş û dagîrkerîya dewleta tirkî de rasteyan de yî. 2 hezar ciwanê ke bajaranê Rojawanî ra ver bi Başûrê Kurdistanî kewtî rayîr, hêrsê xo nîşan dayî. Ciwanî ver bi Berê Sînorî yê Sêmalka şîyî. Rayîrşîyayîşê ciwanan roja hîrêyine de dewam kena. Rayîrşîyayîş de ciwanê ke herêma Cizîr û dormeyê ci ra ameyî û ciwanê ke Reqqa, Minbic, Dêrazor û Şengal ra ameyî zî beşdarê çalakîye bîyî. Ewleyîya rayîrşîyayîşî hetê Hêzê Asayîşî û Ekîbê Trafîkî ra yena girewtiş.

Şerê Qendîlî do peynîya Erdoganî bîyaro

Babete ser o gerîlayê KCRyî qisey kerdî û hişyarîyê muhîmî kerdî. Endamê Koordînasyonê KCRyî Ferzad Arêzî va ‘Qendîl seba şarê kurdî xeta sûre yo’ û wina dewam kerd: “Qendîl qeleya xoverdayîşî yo. Cok ra heta ewro xoser mendo û vera dagîrkerîye de tepîya game nêeşto. Her ke dagîrkerîye hêrişê Qendîlî bikerî, do binkewî. Ez veng dana heme ciwanan ke wa destek bidî xoverdayîşê qendîlî.”

Endama Koordînasyonê KCRyî Ruheyv Agirîye zî wina va: “Kurdî demêko derg o ke çar parçeyê Kurdistanî de rastê hêrişan yenî. Dewleta tirkî do Qendîl de vînî bikero. Kurdî do vera dagîrkerîye de yewîya xo nîşan bidî. Dewleta tirkî seba propoganda hêrişê Qendîlî kena û hewl dana îradeya şarê Kurdistanî bişikna. Şerê Qendîlî do peynîya Erdoganî bîyaro. Kurdî do Qendîl bipawî.”

 

MERKEZÊ XEBERAN